Күндү Үөһээ Бүлүүм бар дьоно! “Үөһээ Бүлүү улууһа” муниципальнай оройуон дьаһалтатын уонна тус бэйэм ааппыттан Аҕа дойдуну көмүскээччи күнүнэн итиитик-истиҥник эҕэрдэлиибин!
Олунньу 23 күнэ – Аҕа дойдуну көмүскүүр Улуу сэрии (1941-1945 сс.), Афганистан (1979-1989 сс.), Чечня (1994-2009 сс.), «Итии точкалар» кыттыылаахтарын чиэстиир, төрөөбүт дойдутун харыстыырга, көмүскүүргэ бэлэм, Аҕа дойдутун тулхадыйбат туругун туһугар туруулаһан үлэлиир, охсуһар, дьиҥ патриот, дойдутугар бэриниилээх ыччаты иитэн таhаарар сыаллаах-соруктаах судаарыстыбаннай бырааһынньык,
Бу күн уол оҕо дойдутугар, дьонугар-сэргэтигэр эрэллээх эркин, халыҥ хахха, суон дурда буолар ытык иэһин туһунан өйдөбүлэ күүһүрэр. Күннээҕи олоххо, дьиэҕэ-уокка уол оҕо, эр киһи, ыал аҕатын дьоһунун өрө тутуу, үрдэтии өбүгэ саҕаттан илдьэ кэлбит төрүт үгэспит буолар.
Саха омук эр дьоно былыр былыргыттан инники кэскил туһугар түмүк-түмүк кэмнэргэ түмсэллэр, сомоҕолоһоллор, олох бары эйгэтигэр инники күөҥҥэ сылдьаллар.
2025 сыл Россияҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччи, Үөһээ Бүлүүгэ патриотизм сылынан биллэриллибитэ. Ыам ыйын 9 күнүгэр дойду үрдүнэн Улуу Кыайыы 80 сылын өрө көтөҕүллэн бэлиэтиэхпит. Олунньу 17-19 күннэригэр биһиги улууспут Кыайыы знамятын өрөгөйүнэн көрүстэ. “Кыайыы десана” сэрии-тыыл бэтэрээннэригэр, сэрии сылын оҕолоругар көмөҕө тахсыа.
Дойдубут улуу Россия туһун көмүскүү, Украинаҕа анал байыаннай дьайыыга хомуурга уонна баҕа өттүлэринэн барбыт уолаттарбыт, убайдарбыт, аҕаларбыт дьиэлэригэр-уоттарыгар этэҥҥэ эргиллэн кэлэллэрин эрэнэ кэтэһэбит. Улуус тэрилтэлэрэ, түмсүүлэрэ, биирдиилээн дьон үп-харчы, тиэхиньикэ-тэрил, мал-сал, таҥас-сап, ас-үөл өттүнэн көмөлөһө олороллор. Улуус дьаһалтатын өттүттэн гуманитарнай таһаҕастаах 3 сырыы оҥоһуллан, буойуттар дойдуларын, дьиэлэрин-уоттарын салгынын ылан, тыынын иҥэринэн, төрүт астарын амсайан, сүргэлэрэ көтөҕүллэр, көхсүлэрэ кэҥиир, санаалара күүһүрэр. Төрдүс сырыы кулун тутарга былааннанар.
Сотору кэминэн сэрии бүтүө, эйэлээх олох туругуруо!
Үөһээ Бүлүү хоһууна, иллээх-эйэлээх олоҕу көмүскээччи, айааччы-тутааччы, саха самныбат быатын, урааҥхай умсубат утаҕын тут!
Саалаахтан самныма, охтоохтон охтума!
Алгыһы кытта Валерий Николаев, “Үөһээ Бүлүү улууһа” муниципальнай оройуон баһылыга