Аан маҥнайгытын ыытыллар «Аар Кудай» Норуоттар икки ардыларынааҕы кэрэ көстүү уонна сиэрдээх майгы куонкуруһа кыайыылаахтарын талла! Санатан эттэххэ, кулун тутар 8 күнүттэн 45 кыыс куо, далбар хотун 9 күн устата туһалаах маастар-кылаастарга үөрэннилэр, саҥарарга-иҥэрэргэ, сиэри-туому тутуһарга, өбүгэ үтүө үгэстэригэр, ураты бүлүүдэлэри астыырга уо.д.а. кэрэ аҥаар сатабылларыгар. Гранд-финалга кыргыттар «Аар Кудай» официальнай партнёрдарын таҥастарын, киэргэллэрин-симэхтэрин кэтэн үрдүк сыанаҕа долгулдьуйа хаамтылар.Маны сэргэ, кыргыттар талаан түһүмэҕэр талыллыбыт нүөмэрдэри көрдөрдүлэр, эстрада сулустара ылбаҕай ырыаларын бэлэхтээтилэр!
Зарьяна Юмшанова- Аар Кудай» бырайыак ааптара, иэйиитэ, салайааччыта, инбиэстэрэ, «ААР КУДАЙ» духуобунай пуонда төрүттээччитэ, Индияҕа ыытыллыбыт «MRS.UNITY WORLD», Арассыыйаҕа «MRS RUSSIAN WORLD» Кэрэ куолар күрэхтэрин муҥутуур кыайыылааҕа, «MRS.UNITY WORLD» Аан дойдутааҕы кэрэ күрэҕин бэрэсидьиэнэ, духуобунай сирдээччи (проводник).
- Бастакы сырыыга «Аар Кудай» үрдүк таһымнаахтык ааста. Хаһан баҕар бастакытын ыытыллар тэрээһин кэккэ ымпыктаах-чыпмпыктааах улахан үлэттэн тахсар. Тэрээһини ыытааччы быһыытынан аныгыс сырыыга өссө үчүгэйдик оҥорору көрдүбүт. Уопсай куоластааһынынан,дьүүллүүр сүбэ быһаарыытынан кыайыылаахтары таллыбыт. Анал ааттары ылбыт кыргыттар бу көстүүгэ эрэ буолбакка, куонкурус маҥнай саҕаланыаҕыттан бэйэлэрин бары өттүнэн чаҕылхайдык көрдөрдүлэр. Биһиги күрэхпит сүрүн сыала-үөрэтии программата, ол эбэтэр дьахтар кэрэ, сырдык өттүгэр талаһыытыгар, уларыйыытыгар, сыанаҕа тахсан эрэллээхтик туттарыгар-хаптарыгар болҕомтобутун уурдубут.
Аар Кудай -истиҥ сүрэхтээх,сырдык дууһалаах, саҥа арыйыыларга аһаҕас, амарах ийэ, дьоҥҥо сэргэҕэ ийэлии истиҥ сыһыаннаах, холобур буолар далбар хотун. Онон Аар Кудайга уонна бары кыргыттарга саҥа олох саҕаланна!
Кэрэ көстүү уонна сиэрдээх майгы куонкуруһугар 45 кыттааччы Саха сириттэн эрэ буолбакка Аан дойду араас муннуктарыттан тиийэ кытыннылар. Ол курдук, уруулуу Бурятия, Кыргызстан уонна Соҕуруу Африка, Намибия,Ботсвана дойдуларыттан кэрэ куолар бааллар. Күрэх саастарынан 3 cүрүн хайысхаҕа арахсар: “Аар Куо” (17-30 саастарыгар диэри) , “Аар Хотун” (31-41), “Аар Далбар”(42 саастарыттан үөһэ) . Куонкурус муҥутуур чыпчаалыгар дьүүлүүр сүбэ талан маннык түмүктэри оҥордулар:
9 анал ааты ыллылар:
Уйгу Далбар –Надежда Львова (Сунтаар)
Күн Далбар-Саргылана Дмитриева (Дьокуускай)
Нарын Далбар-Матрёна Михайлова(Сунтаар)
Арчыына Хотун-Алтаана Мигалкина (Уус Алдан)
Арылы Хотун-Инна Данилова(Уус Алдан)
Күбэйэ Хотун-Лена Васильева (Бүлүү)
Куйаар Куо-Ндеулита ДжоЭн(Соҕуруу Африка, Намибия)
Кэрэ Куо-Манижа Саморцева(Ленскэй)
Эрэлчээнэ Куо-Саргылаана Горохова(Чурапчы)
«Аар Кудай» муҥутуур кыайыылааҕа — Сардаана Гуляева, Уус Алдан
«Аар Далбар» -Зульфия Слепцова Сунтаартан төрүттээх, Дьокуускайга олорор.
«Аар Хотун» -Юлия Симонова (Мииринэй)
«Аар Куо» Василиса Яковлева Үөһээ Бүлүүттэн төрүттээх, Дьокуускайга олорор.
Муҥутуур кыайыылаах «ААР КУДАЙ» Сардаана Гуляева Индияҕа «MRS UNITY WORLD» аан дойдутааҕы кэрэ көстүү күрэҕэр путёвканан уонна 1 мөлүйүөн харчынан наҕараадаланна!
Василиса Яковлева — Аар Куо Үөһээ Бүлүүгэ төрөөбүт, 6-с кылааска диэри Ньурба Маарыгар,7-с кылааһы И.Н. Барахов аатынан оскуолаҕа , 8-11 кылааска диэри Үөһээ Бүлүү лицей-интернатыгар үөрэммит, Лицей-интернат аатын сүгүөҕүттэн маҥнайгы выпускниктарыттан биирдэстэрэ
-Киһи киһиэхэ тылынан быһаарбат үөрүүтэ, билигин да бу түгэни өйдөөн ылыммакка сылдьабын. Ол эрэн бастатан туран бу күрэх, бу ААР КУО буолбутум миэхэ — көннөрү корона, көннөрү Аар Куо аатын сүгүү буолбатах, бу улахан бэйэни сайыннарыыга күүстээх үлэ, чугас дьонум, ИЙЭМ хайдах курдук күүскэ миэхэ эрэнэллэрэ, итэҕэйэллэрэ, хайдах баҕарар түгэммэр миигин өйдүүллэрэ-өйүүллэрэ, кэрэ көстүү уонна ис санаа, ис дууһаттан тахсар сырдык тэҥҥэ силбэспиттэрэ буолар.
“Аар Куо» тэрээһин туһунан
Аар Кудай — диэн тэрээһин аҥардас кэрэ көстүү куонкурустарыттан отой ураты. Манна дьахтар тас көрүҥүн эрэ буолбакка, ис санаатын, бу олоххо, дьоҥҥо тугу тиэрдиэн баҕарарын, амарах санаатын уопсайынан дьахтар аймах бу орто дойдуга хайдах дьоллоох олоҕу олорон ааһарыгар үөрэтиилээх тэрээһин диэн бэлиэтии көрдүм. Бу күрэх миэхэ бэйэбин кытта өссө үчүгэйдик билсиһэрбэр үлэлэһиини ыытта диэхпин баҕарабын, бэйэбэр эрэлбин, күүспүн бөҕүргэттэ, атын кыргыттары көрөн холобур ылан, олохпор саҥа сатабыллары киллэриэм диэн эрэнэбин. Бэйэм да дьоҥҥо-сэргэҕэ, 8 ыйдаах оҕолоох эмийин бырахтарбакка эрэ, төрөөн баран эппин-сииммин оннубар түһэрэн холобур буоллум диэн үөрэбин.
9 күн устата сарсыардаттан киэһээҥҥэ диэри, аһыыр аспытын умнан, таҥаспытын куорат биир түгэҕиттэн биир түгэҕэр соһо-соһо, кыргыттардыын таксиннан тэҥҥэ күлэ-үөрэ, кэпсэтэ-ипсэтэ сылдьыбыппыт саныырга үчүгэйиин.
Соторутааҕыта төрөөбүт буолан эппин-сииммин оннугар түһэрэрбэр улахан суолтаны уурбутум. Сарсыарда аайы зарядкалаан, быыс буллаҕым ахсын медитациялаан, саунаҕа да олорон медитациялыыр олус үчүгэй, кэрэ көстүү күрэххэ кыттыбыт дьоннуун кэпсэтэн, сүбэ-ама ылан сырыттым. Бэйэм тас көрүҥмүнэн эрэ буолбакка ис турукпунан бэлэмнэммитим, бэйэбин туох баҕарар түгэҥҥэ илиибин түһэрбэккэ, эрэлбин сүтэрбэккэ, инним хоту барарым миэхэ саамай суолталаах этэ.
Дьэ ити курдук, Норуоттар икки ардыларынааҕы кэрэни, сырдыгы түстүүр кэрэ уонна сиэрдээх майгы «Аар Кудай» күрэҕигэр кыттыбыт хас биирдии кыттааччы Аар Куо, Аар Хотун, Аар Далбар, Аар Кудай мантан ыла саҥа саҕахтары арыйыа, аартыга арыллан, суола кэҥээн иһиэҕэ диэн эрэнэбит! Сиэрдээх майгы кэрэни үөскэтэр!
Салгыы туох былааннааххын?
-Кэлэр сылларбын бэйэбин үөрэтиигэ аныыбын. Тугу сатаабаппын сатыырга үөрэниэм, уопсайынан аан дойдуга биллэр киһи буолуом, чуолкай ырыаһыт дуу, артыыс дуу, блогер дуу буоламмын диэн эппэппин, ол эрэн аан дойдуга Сахабыт Сирин ааттатыам диэн билэбин. Сахабыт сирин экономикатын сайыннар сыаллаах соруктаах сылдьабын.
Миигин өйөөбүт дьоммор улахан махтал! Эһигинэ суох бу кыайыы суох буолуо этэ, барыбыт кыайыыбыт буолар, хайдах курдук биир сомоҕо, биир сутурук буолан түмсэн, кыайарбытын-хоторбутун бэлиэтэ!
Кэпсэттэ
Уйгулаана ПОРТНЯГИНА
“Аар Кудай” пресс-сулууспата