Сэтинньи 14 күнүгэр, Саха сирин медицинатын Россияҕа, Европаҕа тиийэ ааттаппыт, биһиги Ороһубутуттан төрүттээх, медицина билимин доктора, профессор, Ахмед Романович Варфоломеев 85 сааһын ылар үөрүүлээх түгэнин үллэстэ, Саха сирин үтүөлээх бырааһа Пантелеймон Александрович Семенов арыалдьыттаах, олус истиҥ, сэргэх сэһэргэһии, оруннаах, туһалаах кэпсэтии буолан ааста.
Өссө төгүл Үөһээ Бүлүү дьикти тыыннаах дойду буолара туоһуланна, бу биир улуустан 14 медицина билимин доктора тахсара ханна да суох түгэн! Ол олортон икки профессор биһиги Ороһубутуттан, Ахмед Романович Варфоломеев, Рево Захарович Алексеев оттон өр сылларга медицинскэй институт дириэктэринэн үлэлээбит, медицина үтүөлээх үлэһитэ, профессор Пальмира Георгиевна Петрова Ороһу орто оскуолатыгар эрчимнээх оҕо сааһа ааспыт!
Ахмед Романович Бигиэстэр уустарыттан тардыылаах, Ороһу Өтөхтөөҕөр төрөөн-уһаан, улаатан, Үөһээ Бүлүүтээҕи Бараахап аатынан иккис оскуолаҕа үөрэнэн, Благовещенскайдааҕы медицина үрдүк үөрэх кыһатын бүтэрэн, дойдутугар төннөн кэлэн, эп-эдэр уол түөртэн тахса сыл биир баар-суох, соҕотох хирурунан үлэлээн барбыт. Биэс сыл иһигэр 1000 тахса Үөһээ Бүлүү олохтооҕо кини сылаас илиитинэн ааспыт.
Ити курдук бэриниилээхтик үлэлээн, эдэр сааһыгар медицина билимин кандидата буолан, икки улахан тус бэйэтин методикатын хирургияҕа киллэрэн, олору патеннаан, медицина билимин доктора буолан күн бүгүҥҥэ диэри университекка, педиатрия кафедратыгар уонна ХИФУ оҕо хирургиятыгар, быраас идэтин ылар оҕолору бэлэмнэһэн үөрэтэ, уһуйа олорбут.
Бу курдук чаҕылхай дьон Саха сирин медицинатын сайыннарыытыгар улахан өҥөлөөх буолаллар, ол курдук Пантелеймон Александрович Ахмед Романовичтыын оҕо медицинскэй киинин тутуутун көҕүлээн, тэҥҥэ тутуһан, этэргэ диэри, хас биирдии тоһоҕоҕо тиийэ быһаарсан, бүгүн, биһиги Саха сирин олохтоохторо, Аан дойду таһымыгар эппиэттэһэр оборудованиелаах кииҥҥэ оҕолорбутун көрдөрөр, чөл турукка таһаарар кыахтаахпыт! Ону таһынан, төһөлөөх элбэх плеяда, айылҕаттан айдарыылаах, дьоҕурдаах үөрэнээччилэри иитэн таһааран, билигин биһиэхэ, Саха сиригэр хайа баҕар ыарахан эпэрээссийэ оҥоһуллан, оҕо олоҕо быыһанар! Бу барыта Ахмед Романовичтаах улахан кылааттара буолар! Соҕотох Ахмед Романович аймахтарын бииһин ууһугар СҮҮРБЭ БИЭС наука учуонайдара улаатан үлэлии-хамсыы сылдьаллара киһини сөхтөрөр.
Биһиги, Ороһулар, олус диэн киэн туттабыт, маннык үрдүк таһымнаах дьон улааппыт сирин тыыныгар күөлүһүйэ, көҥүл көччүйэ, улаата, үлэлии-хамсыы, олох-дьаһах тэринэн олорорбутуттан уонна оҕолорбутугар холобур буолалларыгар, сырдыкка кэрэҕэ угуйалларыгар, хайа да сыралааах үлэттэн чаҕыйбакка, бэриниилээх буолууга үөрэтэллэригэр БАРҔА МАХТАЛ!
Анна Иванова