Ааспыт сыл бүтүүтүгэр, ахсынньы 22 күнүгэр, Ороһу нэһилиэгэр, «Ороһу Сынньалаҥ Киин» тэрилтэ, «Иэйэхсит» оҕо бөлөҕө уонна И.Е.Иванов — Уйбаан Ороһуунускай аатынан модельнай библиотека, оскуола оҕолоругар анаан, аан дойду остуоруйаларын сахалыы тылбаастаан туруорар, улуустааҕы аһаҕас күрэх-тэрээһини ыыппытын туһунан иһитиннэрбиппит.


Ол сэргэх тэрээһиҥҥэ, Дүллүкүбүт оскуолатын үөрэнээччилэрэ кытыбыттара. Ирдэбил быһыытынан, VIII-с, IX-с, X-с уонна XI-с кылаастан хомуллан, 15 үөрэнээччи биир хамаанда буоланнар, бүрээт омук «Өйдөөх кутуйах» диэн остуоруйатын сахалыы тылбаастаан, инценировка туруораннар, биһиги оскуолабыт үөрэнээччилэрэ II-с бочуоттаах миэстэни ыланнар, ҮӨҺЭЭ БҮЛҮҮ — ДЬОКУУСКАЙ — ҮӨҺЭЭ БҮЛҮҮ хайысхатынан баран кэлэр путевканан наҕараадаламмыттара.


Дьэ, ол курдук, үөрэнээччилэрбит Дьокуускай куоракка кэлэн, кулун тутар 2 күнүгэр, Сахабыт сирин биир бастыҥ үөрэҕин кыһата буолар, «АЙЫЫ КЫҺАТА» диэн ааттаах национальнай гимназияҕа ыалдьыттаатылар. Үөрэнээччилэрбит, бу үөрэх кыһатын иһигэр үгэскэ кубулуйбут, саҥа ый үүнүүтүн көрсөр алгыс тэрээһинигэр сырыттылар.
Даҕатан эттэххэ, манна биһигини бэйэлээх-бэйэбит биир дойдулаахпыт, Уйбаан Ороһуунускай төрөппүт кыыһа — Тюркана Ивановна Сергеева үөрэ-көтө көрүстэ. Биһиги, кини билигин «Айыы Кыһата» национальнай гимназия салайааччытын үөрэх чааһыгар солбуйааччытынан үлэлиирин үөрэ да, киэн тутта да иһиттибит. Үөрэнээччилэрбит сырыыларын маҥнайгы күнэ маннык саҕаламмыта көннөрү сөп түбэһии буолбатаҕыгар бүтэйдии эрэннибит.
Салҕыы, Хаҥалас улууһун, Өктөм нэһилиэгэр баар, Саха Сирин саарына, бастакы бэрэсидьиэммит Михаил Ефимович Николаев аатын сүгэр үөрэх кыһатыгар сылдьаммыт, санаа атастаһан, билиибитин хаҥаттан кэлэрбит былааннанар.


Саха омуга былыр-былыргыттан илдьэ кэлбит үгэһин туһунан уос номоҕо буолбут этиитинии АЛГЫС БАҺА СЫАЛАННЫН!

Наталья Степанова, 

Дүллүкү орто оскуолата

Читайте дальше