Кэнники сылларга олохтоох көҕүлээһини өйүүр программа (ППМИ) диэн олохтоох нэһилиэнньэ кыттыылаах куонкуруһун республика үбүлээһинин министиэристибэтэ тэрийэн ыытара тыа нэһилиэктэрэ үлэни-хамнаһы ыыталларыгар олус туһалаах буолла. Ол курдук, Үөһээ Бүлүү улууһун Балаҕаннаах нэһилиэгэ бу куонкуруска кыттан, оҕо оонньуур былаһааккатын, водопроводы үлэҕэ киллэрбитэ.
Улуус биэс нэһилиэгин халаан уутунан ньүөлсүтэр Ороһу-Ньэгэдьээк мелиоративнай систиэмэтин түмүк уута Балаҕаннаах нэһилиэгин хаба ортотунан баар хоруунан кэлэн, Бүлүү өрүскэ түһэр. Бу кэлэн ааһар уу түҥ былыргыттан баар «Алаас» диэн сүөһү уулуур, дьон иһэр наадатыгар туттар күөлүн халаан уутун кытары илдьэ баран хаалан, төрүкү уолан, былыргы онно эрэ хаалбыта. Күөлү чөлүгэр түһэриигэ нэһилиэк бэйэтин бюджетыттан биэс сүүс тыһыынчаны 2018 сылга, улуус бюджетыттан биир мөлүйүөн 2021 сылга көрүллэн, үлэ ыыттыллыбыта. 2022 сылга “Алаас” күөлү чөлүгэр түһэриигэ 1 мөл. 995 тыһыынча солкуобайдаах, салгыы 2023 сылга “Алаас” күөлүгэр 2 мөл. 660 тыһыынча солкуобайдаах үлэлэр барбыттара.
Бу 2024 сылга “Алаас” күөлү чөлүгэр түһэриигэ үп министиэристибэтиттэн 2 мөлүйүөн көрүллэн, нэһилиэнньэттэн 60 000 солк., дьаһалта бюджетыттан — 300 000 солк., спонсордартан 300 000 солк. харчы хомуллан, 3-с этап үлэтэ алтынньыга түмүктэннэ.
Кэлэр 2025 сылга 2 мөл. 489 тыһыынчалаах “Алаас” күөлүн уута хааларын курдук “Водоподпорнай сооружения” диэн ааттаах тутуу саҕаланыахтаах.
Балаҕаннаах нэһилиэгин дьаһалтата