Андрей Кривошапкин- Айыҥа — саха төрүт итэҕэлин сөргүтээччи, тарҕатааччы, өбүгэ урууна (уурунуу) суругун чинчийээччи буоларын элбэх киһи истибит да, билэр да буолуохтаах. Кини чинчийбит үлэтин салҕаан, дьоҥҥо-сэргэҕэ тарҕата-үөрэтэ сылдьар бэйэбит уолбут Андрей Семёнов — Күн Уола Өндөр Өй буолар.
Биһиги көрдөһүүбүтүн быһа гыммакка, Үөһээ Бүлүүгэ олунньу 8-9 күннэригэр история уонна этнография түмэлигэр кэлэн үлэлээн барда. Үөрэх чэрчитинэн бэйэтэ туспа программалаах, олус чэпчэкитик киһи өйүгэр киирэрдии, өйдөнүмтүөтүк быһааран үөрэттэ. Уурунуу суругунан суруллубут күүстээх харысхал, алгыс өйдөбүллэрин, саха түҥ былыргы суругун ааҕар, киэҥ баай ис хоһоонун өйдүүр буоллубут.
Өндөр Өй сахалыы ааттарбытын аахтара үөрэппитигэр, киһи дьиктиргиэх, хас биирдиибит аата бэйэбит майгыбытын илдьэ сылдьара арылыччы көстөн кэллэ…
Икки күн үөрэтии, биллэн турар, саҥа саҕалааһын буоллаҕа. Өндөр Өй «бассаап» ситимигэр бөлөх арыйан, билиибит өссө хаҥаан, билбэппитин-өйдөөбөппүтүн ыйыталаһан иһиэхпит диэн анал бөлөх арыйда. Туругу тупсарар, санааны сааһылыыр-сырдатар үөрэҕэр сылдьан элбэҕи биллибит-көрдүбүт.
Элбэх киһи «уурунуу суругу ааҕар куһаҕан үһү» дииллэрин истэн кэллэхпит. Оннук буолбатаҕын, төттөрүтүн манна барыта сырдык сурулла сылдьарын үөрэнэн баран бэйэбитигэр өссө төгүл бигэргэттибит. Уурунуу суругу үөрэтэн аахтахха — барыта күүстээх алгыс, таптал тыллара эбит диэн өйдөбүлгэ кэллибит. Бар дьоммутун бэйэбит өбүгэлэрбит хаалларбыт суруктарын-бичиктэрин үөрэтэн күннээҕи олоххутугар туһаныҥ диэн ыҥырабыт.
Манан туһанан, улуустааҕы история уонна этнография түмэлин үлэһиттэригэр уонна сайдыылаах, эдэр эрчимнээх биир дойдулаахпытыгар, уһуйааччыбытыгар Күн Уола Өндөр Өйгө махталбытын тапталбытын тиэрдэбит. Баҕарабыт доруобуйаны, дьон туһугар кэрэни-сырдыгы тарҕата сылдьар сыралаах, эппиэтинэстээх үлэҕэр элбэх ситиһиилэри, тус олоххор дьолу!
«Үнүгэс» түмсүү, Үөһээ Бүлүү