Олунньу 15 күнүгэр дойду тэбэр сүрэҕэр Москуба куоракка аатырбыт ВДНХ уораҕайыгар Аан дойдутааҕы «Арассыыйа» быыстапка-форумугар Култуура күнүгэр Саха сириттэн 8 киһиттэн турар бастыҥ үлэлээх бибилэтиэкэ идэлээхтэрин дэлэгээссийэтэ бара сырытта. Манна М. С. Романов аатынан Нам олохтоох бибилэтиэкэтин сэбиэдиссэйэ Саввинова Уруйдаана Юрьевна баран кыттан кэллим. Дэлэгээссийэ салайааччытынан СӨ култуураҕа уонна духуобунай сайдыыга Министиэристибэтин Олохтоох бэйэни салайыныы уорганнарын кытта үлэлэһэр отдел салайааччыта Вера Афанасьевна Моисеева сырытта.
Күн бастакы аҥарыгар «О ключевых результатах и достижениях в области культуры» диэн ааттаах Арассыыйа Култуураҕа миниистирэ О. Б. Любимова кыттыылаах улахан пленарнай сиэссийэ буолла. Пленарнай сиэссийэни модератор, биллииллээх успуорт комментатора Дмитрий Губерниев бэрт тэтимнээхтик, өрө көтөҕүүлээхтик ыытта. Спикердарынан Нижегородскай, Самарскай, Новгородскай уобаластар губернатордара, артыыс Сергей Безруков, Третьяковскай галерея генеральнай директора Елена Проничева уонна да атыттар кыттыыны ыллылар. Сиэссийэ уопсай тутула Култуура үлэтэ дойду социальнай-экэнэмиичэскэй сайдыытыгар оруола диэн барыл тула буолла. Модельнай бибилэтиэкэлэр оруолларын туһунан Самарскай уобалас губернатора Дмитрий Азаров этиитин сөбүлээн иһиттибит, ол курдук билиҥҥи бибилэтиэкэ социо-култуурунай тэрилтэ быһыытынан уһулуччу оруоллааҕын тоһоҕолоон бэлиэтээтэ, уобаласка Национальнай бырайыагын 24 библиотеканы сайыннарбыт буоллахтарына, регион бүддьүөтүттэн харчы көрөн эбии 12 бибилэтиэкэни саҥалыы оҥоһуулаах (модернизированнай) гына оҥотторбут.
Күн иккис аҥарыгар «Библиотеки будущего для всей семьи: гармония знаний и традиций» диэн кэмпэриэнсийэ буолла. Манна Арассыыйа Култуура миниистирин солбуйааччыта Надежда Преподобная билиҥҥи бибилэтиэкэлэр араас саастаах, дьарыктаах дьону түмэр, билиини биэрэр, араас дьарыкка уһуйар дьиҥнээх култуурунай сыантыр буоларын эттэ. Ол аата манна кинигэ эрэ уларсар сир буолбакка, араас мастер-класстар, элбэх интэриэһинэй көрсүһүүлэр, анал тэрээһиннэр буолаллар диэн тоһоҕолоото.
Кэмпэриэнсийэ кэннэ регионнар быыстапкаларын кэрийэн, араас креативнай экспозиция арааһа баарын көрөн сөхтүбүт, быыстапка регион култуурунай кодун толору арыйарга туһуламмыт.
Олунньу 6 күнүгэр Дойду биллэр бибилэтиэкэлэригэр «Молодежка» диэн аатынан биллэр Арассыыйатааҕы судаарыстыбаннай ыччат бибилэтиэкэтигэр уонна Н. А. Некрасов аатынан Центральнай универсальнай научнай бибилэтиэкэҕэ, эбэтэр «Некрасовкаҕа» ыалдьыттаатыбыт. Уонча сыл анараа өттүгэр туох да өрөмүөнэ суох турбут, онтон билигин билиҥҥи кэм ирдэбилигэр эппиэттиир толору хааччыллыылаах, тупсаҕай дизайннаах гына оҥоһуллубут бибилэтиэкэлэр айымньылаах үлэлэрин кытта билистибит. Хаһан эрэ биһиги бибилэтиэкэлэрбит эмиэ маннык элбэх ааҕааччыны тардар тупсаҕай оҥоһуулаах буола сайдыахтара (модернизацияланыахтара) диэн эрэл санаалаах экскурсиялары түмүктээтибит.
Бу сырыы түмүгэр бибилэтиэкэ үлэтигэр судаарыстыбаттан улахан болҕомто ууран эрэллэрин биллибит, биир идэлээхтэрбитин кытта билсэн опыт атастастыбыт, дойду бастыҥ бибилэтиэкэлэригэр сылдьан сүргэбит көтөҕүлүннэ, салгыы айымньылаах үлэҕэ умсарга төһүү күүс буолла. Түмүгэр бу дэлэгээссийэҕэ бастыҥ үлэлээҕинэн талыллыбыт О. Д. Федорова аатынан Үөһээ Бүлүүтээҕи кииннэммит библиотечнай ситим аатыттан эппиэтинэстээх сырыыга ыыппыт салайааччыбар Петрова Наталья Кирилловнаҕа барҕа махталбын этэбин.
М. С. Романов аатынан Нам олохтоох бибилэтиэкэтин сэбиэдиссэйэ Уруйдаана Саввинова