Олунньу 10 күнүгэр оройуоммут тэриллибитэ 90 сылыгар, ааспыт 2024 сыл түмүгүнэн үлэнэн дьолломмут дьоһун дьоммутугар, ситиһиилээх үлэлээх тэрилтэлэргэ, муниципальнай тэриллиилэргэ, ураты тэрээһиннэргэ анал ааттары туттардылар.
«БАСТЫҤ САЛАЙААЧЧЫ» анал аат иҥэриллэр ИВАНОВ Альберт Юрьевичка, «Үөдүгэй нэһилиэгэ» муниципальнай тэриллии баһылыгар. 2024 сыллаахха Үөдүгэй нэһилиэгэр олохтоох көҕүлээһиннэри өйөөһүн бырагырааманан, Куду нэһилиэгэр саҥа ыһыахтыыр сир тутуллан үлэҕэ киирдэ. Саха Өрөспүүбүүкэтин тутууга министерствотын кытта үлэлээһин түмүгэр «Хаачыстыбалаах дьиэнэн хааччыллыы» бырагырааманан «Молодежнай» микрорайоҥҥа, саҥа уһаайбаларга гаас, уот ситимнэрэ тардылыннылар. Нэһилиэнньэҕэ аналлаах памп-трека, вело-беговой суоллар оҥоһуулара түмүктэннэ, «Үөдүгэй нэһилиэгин» «Күҥкү» сынньалаҥ пааркатын тупсарыыга 11 мөл 246.000 суммалаах үлэ салҕанар.
СЫЛ БАСТЫҤ АРЫЙЫЫТА» анал аат иҥэриллэр ЗАХАРОВА Ольга Петровнаҕа, урбаанньыкка. Ольга Петровна дойдуга анал байыаннай дьайыы саҕаланыаҕыттан бэйэтин баҕатын өттүнэн, ыраах дойдуларыттан тэлэһийэ сылдьар уолаттарбытыгар дойду ахтылҕаннаах булдун, көмүс хатырыктааҕын, минньигэс аһын – үөлүн астаан тиһигин быспакка хааччыйан олорор, барыбытыгар үтүө холобурга сылдьар биир дойдулаахпыт.
«БАСТЫҤ ДЬИЭ КЭРГЭН» анал аат иҥэриллэр Антонина уонна Геннадий АВВАКУМОВТАРГА. Петр Тобуроков аатынан Нам орто оскуолатын директоры солбуйааччыта, математика учуутала Антонина Тимофеевна, физкультураҕа учуутала, нэһилиэк спортка инструктора Геннадий Леонидович оскуола үөрэнээччилэрин улууска, Саха сиригэр, Арассыыйаҕа, Аан дойду таһымнаах спорт, үөрэх, культура салааларыгар бэлэмнээн үрдүк көрдүрүүнү ситистилэр. Оҕолоро Эмилия Үөһээ Бүлүү улууһун остуол тенниһин сүүмэрдэммит хамаандатын чилиэнэ,спорт маастарыгар кандидат, Виктория «Сааскылаана» оҕо үҥкүү ансамблыгар үҥкүүһүт, Юлия ох саа ытыытынан дьарыктанар. Төрөппүттэр бэйэлэрин холобурдарынан чөл олоҕу, саха төрүт үгэстэрин, спорду өрө тутан, араас тэрээһиннэргэ көхтөөхтук кыттан оҕолорун иитэллэр.
«БАСТЫҤ ДЬОНУ СОМОҔОЛООБУТ (ТҮМПҮТ) ТЭРЭЭҺИН» анал аат иҥэриллэр М.Т. Егоров аатынан 2-с № Үөһээ Бүлүү орто оскуолатын 50 сыллаах үбүлүөйдээх тэрээһинигэр, салайааччы Руфов Васмар Анастасьевич. ССРС, Саха Өрөспүүбүлүкэтин, Российскай Федерация народнай учууталлара Михаил Андреевич Алексеев, Василий Софронович Долгунов, Виктор Филиппович Потапов үлэлээбит оскуолатын коллектива улуус култуурунай, спортивнай, социальнай тэрээһиннэригэр мэлдьи көхтөөхтүк кыттар, оҕону кыра сааһыттан патриотическай иитиигэ сыал – сорук туруоран үлэлиир.
«ИДЭТИГЭР БЭРИНИИЛЭЭХ» анал аат иҥэриллэр ВАСИЛЬЕВА Ирина Анатольевнаҕа «Аэропорты Севера» Федеральнай казеннай тэрилтэ Үөһээ Бүлүүтээҕи филиалын дьону, таһаҕаһы таһар сулууспа салайааччытыгар. Ирина Анатольевна авиация эйгэтигэр уопсайа 45 сыл үлэ стажтаах бастыҥ туруу үлэһит, Саха Өрөспүүбүлүкэтин салгын транспорын бочуоттаах үлэһитэ, авиация бэтэрээнэ, Валерий Кузьмин аатынан бириэмийэ лауреата, Үөдүгэй нэһилиэгин бочуоттаах олохтооҕо. Ирина Анатольевна бэйэтин баай уопутун, билиитин – көрүүтүн, сүбэтин – аматын эдэр көлүөнэ үлэһиттэргэ тириэрдэр.
«БАСТЫҤ ТЭРИЛТЭ» анал аат иҥэриллэр «Үөһээ Бүлүү улууһун (оройуонун)» муниципальнай бүддьүөтнэй оскуола иннинээҕи үөрэхтээһин тэрилтэтэ» «Ыллыкчаан» оҕону сайыннарар киинигэр, салайааччы Романова Надежда Степановна. «Ыллыкчаан» оҕону сайыннарар киин 2024 сылга үрдүк ситиһиитинэн буолла, оскуола иннинээҕи саастаах оҕолору иитэр- үөрэтэр программатыгар олоҕуран “Оҕо билэр- көрөр, бодоруһар, айар- тутар эйгэлэрин дьүөрэлээн иитэр ”Чудо город” методическай комплегын үлэҕэ киллэрэн Федеральнай пилотнай былаһаакка кыттыылааҕа буолары ситистэ.
«УЛУУСКА БИЛЛЭРИЛЛИБИТ СЫЛЫНАН БАСТЫҤ ҮЛЭЛЭЭХ ТЭРИЛТЭ» анал аат иҥэриллэр Саха Өрөспүүбүлүкэтин судаарыстыбаннай автономнай тэрилтэ «ЯКУТЛЕСРЕСУРС» Үөһээ Бүлүүтээҕи филиалыгар, салайааччы Захаров Алексей Владимирович. Тэрилтэ быйыл сайын турбут ойуур баһаарын умуруорууга 1000-н тахса дьонноох мобилизованнай этэрээттэри тэрийэн үтүө түмүктээх үлэни ыытта, киэҥ иэннээх сиргэ ойууру харыстыыр, ырааһырдар үлэни тиһигин быспакка үлэлээтэ.
БАСТЫҤ ЭДЭР ҮЛЭҺИТ» анал аат иҥэриллэр СЕМЕНОВА Хаар Захаровнаҕа Александр Дмитриевич Филиппов аатынан Хоротооҕу култуура дьиэтин методиһыгар.
2024 сылга Самара куоракка IV төгүлүн ыытыллыбыт аан дойду таһымнаах «Грани таланта», конкурс-фестивальга 2 степеннээх лауреата, Аан дойду норуоттар икки ардыларынааҕы «Истоки традиционных верований в контексте эпического наследия народов Евразии» научнай конференция кыттыылааҕа, өрөспүүбүлүкэтээҕи телевизионнай «Күн оһуохайа» бырайыак наставнига, саха төрүт култууратын тарҕатааччы, уһуйааччы.
Наҕарааданы тутар ийэтэ Ефремова Тамара Владимировна.
«Үөһээ Бүлүү» хаһыат