Саха көрөөччүлэрин куттарын туппут, дириҥ ис хоһоонунан, эриирдээх, таайтарыылаах сюжетынан сөбүлэппит, суруйааччы Валентина Гаврильева «Уот Дьулустаан» айымньытынан уһуллубут киинэ-сериалы хас киэһэ ахсын тулуйбакка-тэһийбэккэ көрөбүт, инникитин туох буолуоҕун таайа-билэ сатыыбыт. Бу оһуобай үчүгэй артыыстардаах, режиссуралаах, музыкальнай доҕуһуоллаах киинэҕэ хотуна Ылдьаанаҕа барытын тиһэ, кэпсии сылдьар Хобороос оруолун биһиги бэйэбит кыыспыт, Үөһээ Бүлүү Далырыттан төрүттээх, билигин П. А. Ойуунускай аатынан Саха Академическай тыйаатырга үлэлиир эдэр артыыска Сандаара Федотова олус итэҕэтиилээхтик, чаҕылхайдык оонньуур. Биир дойдулаахтара Сандааранан киэн туттан, оруолун олус да табан оонньууругар махтанан туран, бүгүн кинилиин сэһэргэһиибитин эһиги болҕомтоҕутугар таһаарабыт:
— Сандаара, үтүө күнүнэн! Баһаалыста бэйэҥ тускунан билиһиннэриэҥ дуо?
— Дорооболоруҥ! Мин Үөһээ Бүлүү Далыр нэһилиэгиттэн төрүттээхпин. Биэс кыыс оҕолоох Татьяна Васильевна, Николай Егорович Федотовтар дьиэ кэргэттэригэр бэһис кыыһынан төрөөбүтүм. Дойдубар оскуоланы бүтэрэн баран Москваҕа М. С. Щепкин аатынан үрдүкү театральнай училищены үөрэнэн бүтэрбитим.
— Хас биирдии киинэҕэ артыыстары бэрт уһуннук сыымайдаан талаллар. Эйигин бу оруолга хайдах ыҥырбыттарай?
— Миэхэ режиссер Елена Эверстова эрийэн эйигин биир оруолга көрөбүн, быыс булан көрсүөххэ эрэ диэн дьиэтигэр ыҥырбыта. Камера иннигэр биир-икки сценаны аахтаран көрбүтэ уонна бу күннэргэ биллэ сылдьыаҕым диэбитэ. Сотору кэминэн эрийэн: «Эйигин Хобороос оруолугар таллыбыт», — диэбитэ.
— Дьэ, Хобороос оруолун оонньуур төһө уустук этэй?
— Бу оруол мин майгыбар утары уобарастаах персонаж буолан, оонньуурга уустук этэ. Хоборооһу хайдах оонньуохха, уобараһын толору арыйыахха, көрөөччүгэ тиэрдиэххэ диэн балай да уһуннук толкуйдаабытым.
— «Уот Дьулустаан» сериалга уһуллар кэмҥитигэр өйдөөн хаалбыт түгэннээххин дуо?
— Уһуллар кэммит барыта сэргэх, сырдык этэ. Устар бөлөх бары биир дьиэ кэргэн курдук буолан хаалбыппыт. Өйдөөн хаалбыт түгэним диэн… Үрдүттэн уһуллаары Таатта улууһун Чөркөөх нэһилиэгин оскуолатыгар түспүппүт. Манна музейдаах, балаҕаннардаах, миэлиҥсэлээх — ураты тыыннаах сир. Арай уһуллар күммэр этэрбэспин оскуолаҕа хаалларан кэбиспит этим. Музей уонна оскуола икки арда син чугас этэ эрээри, төттөрү-таары “мыыскайданар” түгэннээхпит. Ити эйгэни сэҥээрэр буоламмын уһуллар аппытын миинэн көрбүттээҕим. Бары да күннэрим миэхэ өйбөр хатанан хаалбыттар.
Сериалга бу бастакы холонуум буолар, өссө биир киинэҕэ кыра оруолга уһуллубутум. Түгэнинэн туһанан, биир дойдулаахтарбар эҕэрдэбин ыытабын, үөрэппит учууталларбар улаханнык махтаныам этэ. Барыгытыгар саамай сүрүнэ, бигэ, кытаанах доруобуйаны, дьолу-соргуну баҕарабын!
Онтон биһиги Сандаараҕа төрөөбүт дойдута – Үөһээ Бүлүү оройуона 90 сааһынан истиҥ эҕэрдэбитин ыытан туран, айар үлэтигэр аартыктара арылла, бу курдук ситиһиилээхтик үлэлии-хамсыы, өссө да чаҕылхай оонньуутунан сахатын дьонун үөрдэ-көтүтэ турарыгар баҕарабыт!
Кэпсэттэ Галина Васильева
«Үөһээ Бүлүү» хаһыат