Бүлүү улууһун Балаҕаччы нэһилиэгиттэн 13 км тэйиччи ойуурга турбут уоту чинчийиигэ салгын аала көтүөҕэ. Ан-2 сөмөлүөт 12 чааска көтүөҕэ. Көтөн көрүү кэннэ салгыы туох-ханнык үлэ ыытылларын быһаарыахтара. Бу туһунан экология минииистирэ Андрей Коноплев салайааччылаах суһал ыстаап мунньаҕар иһитиннэрдилэр.
Бүлүүтээҕи ойуур хаһаайыстыбатын салайааччыта Михаил Кутугутов иһитиннэрбитинэн, ойуур баһаара нэһилиэнньэлээх пууннарга, экономика эбийиэктэри кутталы суоһаабат. Баһаарга 70 киһи, 5 тиэхиньикэ үлэлии сылдьар. ААспыт сууккаҕа ойуур уотун хоту уонна арҕаа өттүнэн утары уоту ыыппыттар. Минерализованнай балаһаны эмиэ уот арҕаа өттүнэн бэлэмнээбиттэр.
Бэс ыйын 1 күнүнээҕи иһитиннэриинэн, Саха сиригэр уопсайа 9 ойуур баһаара 7715,5 га иэннээх сиргэ, оттон ойуура суох сиргэ тахсыбыт баһаар 50 га иэннээх сиргэ тахсыбыт. Ордук харыстанар сирдэргэ 3208,5 га иэннээх 6 ойуур баһаарын умуруоруу үлэтэ бара турар. Күн бүгүн баһаар Бүлүү, Үөһээ Халыма, Томпо, сунтаар уонна Өлүөхүмэ улуустарыгар бэлиэтэнэн турар. Оһуобай бэрээдэгинэн ойуур баһаарыттан сэрэхтээх буолуу эрэсиимэ Алдан, Амма, Бүлүү, Үөһээ Халыма, Өлүөхүмэ, Сунтаар уонна Таатта улуустарыгар биллэриллэн турар.
Бүгүн Өлүөхүмэ улууһун тиэхиньикэ кыайан тиийбэт баһаардарыгар үлэһиттэри тириэрдии үлэтэ барар. Сунтаар улууһугар Ми-8 бөртөлүөт вездеход туһанар оттугун тиксэриэҕэ. Ону тэҥэ эбиэт кэннэ Ньурба улууһугар тахсыбыт ойуур баһаарын көрүөхтэрэ.
Санатар буоллахха, баһаартан сэрэхтээх буолуу кэмэ Саха сиригэр ыам ыйын 6 күнүгэр арыллыбыта. бу кэм иһигэр өрөспүүбүлүкэ үрдүнэн 33 ойуур баһаара таҕыста, мантан ойуур баһаара — 8127,15 га иэннээх сиргэ, ойуура суох 24 баһаартан 727,64 га иэннээх сир эмсэҕэлээтэ. Мантан 24 ойуур уонна 11 ойуура суох сиргэ тахсыбыт баһаар умуруорулунна. Ыксаллаах быһыы-майгы эрэсиимэ Өлүөхүмэ улууһугар ыам ыйын 29 күнүгэр биллэриллибитэ.
СӨ Бырабыыталыстыбатын уонна Ил Дархан пресс-сулууспатын матырыйаалыттан
