Муус устар 20-21 күннэригэр Бүлүү улууһугар Дьоруой Н.С.Степанов аатынан 3-с нүөмэрдээх орто оскуолаҕа үтүө үгэскэ кубулуйбут аһаҕас саахымат турнира буолан ааста. Турнир байыаннай дьайыы бэтэрээнэ, Кыһыл сулус уонна Хорсун быһыы уордьаннарын кавалердара, “За отвагу”, “За боевые заслуги” мэтээллэр хаһаайына, Афганистаҥҥа, Сирияҕа, Чечняҕа сулууспалаабыт Роман Капитонов сырдык кэриэһигэр ананна. Бу туһунан “Олох суола” хаһыат саайта иһитиннэрдэ.
Роман табаарыстара ахталларынан, кини оҕо сааһыттан саахымакка оонньуурун туохтааҕар да ордорор эбит. Төһө да кэм-кэрдиис ааспытын иһин, бу сөбүлүүр дьарыгын бырахпатах. Ону өйдөөн, табаарыстара уонна аймахтара турнир тэрийэн саҕалаабыттар, ол кэнники үтүө үгэскэ кубулуйан улуус таһымнаах ыытыллар буолбут. Турнир Роман үөрэммит оскуолатыгар сыллата буолар.
Турнирга 55 саахыматчыт кытынна. Үөһээ Бүлүү улууһуттан эдэр саахыматчыттар хамаандалара кэлэн олус бэркэ кииристилэр. Икки күннээх турнир түмүгүнэн, саастарынан арааран кыайыылаахтары быһаардылар. Салгыы биир дойдулаахтарбыт ситиһиилэрин билиһиннэрэбит.
1-5 кылаас үөрэнээччилэригэр уолаттарга Үөһээ Бүлүүттэн Саян Тимофеев чөмпүйүөн аатын ылла. Үрдүкү кылаас оҕолоругар уолаттарга Данил Васильев бастаата. Эр дьоҥҥо үһүс миэстэни Чаҕыл Чагылысов ылла.
Наҕараадалааһыҥҥа Бүлүү улууһун саахымат федерациятын бэрэссэдээтэлэ Александр Григорьев байыаннай дьайыы бэтэрээннэрин ассоциациятын аатыттан бириистэри туттартаата. байыаннай дьайыы бэтэрээннэрин ассоциациятын (сал. Н.Гребенников) туруорбут бириистэрин Үөһээ Бүлүү улууһун саахымат федерациятын бэрэссэдээтэлэ Валерий Семенов уонна кыттааччы Алексей Ефимов ыллылар. Маны таһынан эдэр кыттааччылар эмиэ бэлэхтэри тутан үөрдүлэр-көттүлэр.
Күрэх түмүгэр Бүлүү улууһун спорт кэмитиэтин бэрэссэдээтэлэ Ольга Калачикова саахымат оонньуута кэлэр кэнчээри ыччаппытыгар ордук тарҕанан эрэрин бэлиэтээтэ.
«Үөһээ Бүлүү» хаһыат
