Бүгүн Үөһээ Бүлүүтээҕи Д.С. Спиридонов аатынан 4-с нүөмэрдээх орто оскуолаҕа 2024-2025 үөрэх сылын арыйар Билии бырааһынньыгын үөрүүлээхтик бэлиэтээтилэр.
Оскуолаҕа быйыл 474 оҕо үөрэнэр, мантан 47-тэ бастакы кылааска киирдилэр, 32 үөрэнээччи 11-с кылааска, 44 үөрэнээччи 9-с кылааска үөрэнэр. Бу оскуола бастыҥ категориялаах, баай уопуттаах учууталлары кытта тэҥҥэ эдэр учууталлар биир санаанан үлэлиир, түмсүүлээх улахан коллектив буоларынан уратылаах.
Үөрүүлээх линейканы оскуола директора Сергей Кардашевскай эҕэрдэтинэн арыйда. Кини оскуола инники соруктарыгар улахан үлэлэр күүтэллэрин тоһоҕолоон бэлиэтээтэ. Салгыы Үөһээ Бүлүү улууһун Баһылыгын бастакы солбуйааччы Егор Иванов, улуустааҕы үөрэх салалтатын специалиһа Калиста Борисова, Үөһээ Бүлүү нэһилиэгин аатыттан ВасилийНиколаев эҕэрдэлээтилэр. Үөһээ Бүлүү нэһилиэгин аатыттан байыаннай дьайыыга кыттыыны ыла сылдьар төрөппүттээх 1 кылаас оҕолоругар бэлэхтэри туттардылар.
Улуустааҕы үөрэх салалтатын аатыттан биир дойдулаахпыт, СР «Ил Түмэн» государственнай мунньаҕын 2 төгүл депутатынан таһаарыылаахтык үлэлии сылдьан, төрөөбүт улууһун сайдыытыгар элбэх үтүөнү оҥорбут, ол иһигэр Д.С. Спиридонов аатынан 360 оҕо үөрэнэр таас оскуола үлэҕэ киириитигэр сүдү кылаатын киллэрсибит Александр Мироновка ананан быйыл тахсыбыт кинигэтин, кини дьиэ кэргэнэ, олоҕун аргыһа, тапталлаах кэргэнэ Елена Гаврильевна оскуолаҕа анаан бэлэх ыыппытын үөрэх управлениетын специалиһа Калиста Борисова үөрүүлээх быһыыга туттарда.
Түмүккэ, Үөһээ Бүлүүтээҕи 4-с нүөмэрдээх Д.С. Спиридонов аатынан орто оскуола үлэһит коллективыгар, үөрэнээччилэригэр ситиһиилэри, өрүү инники кирбиигэ буолууну баҕарабыт!
Калиста Борисова,
үөрэх управлениетын специалиһа
