Саха Республикатыгар “Оҕо сылын” уонна Россияҕа “Дьиэ кэргэн сылын” чэрчитинэн, CӨ Үөрэххэ уонна наукаҕа министиэристибэтэ 2024 сыл муус устар ыйынааҕы бирикээһигэр олоҕуран, “ДеТвоРа – детство, творчество, развитие” күрэх балаһыанньатыгар тирэҕирэн, “Моя семейная фотоистория” Де-блокка Үөһээ Бүлүүтээҕи 6-с нүөмэрдээх “Солнышко” уһуйаан историятын ааҕан-үөрэтэн баран кыттарга соруммуппут.
Бу блокка фотоколлаж оҥорбуппут, ис хоһооно төрөппүт бу уһуйааҥҥа иитиллибит, кыра эрдэҕинээҕи хаартыскатын уонна бу уһуйааҥҥа сылдьар оҕотун киллэрэн туран историятын кэпсээн ыытыахтаах этилэр. “Солнышко” историятын арыйан, билиҥҥи иитиллээччилэрбитин кытары ситимнээн, алта дьиэ кэргэн Солнышко уһуйааҥҥа сылдьыбыттарын быһаарбыппыт, ол курдук, Егоровтар, Елисеевтар, Николаевтар, Бояновскайдар, Кузьминалар, Босоевтар кыттыахтарын сөп диэн, үлэбитин хаартыска көрдөөһүнтэн саҕаламмыта.
Төрөппүттэрбит үөрэ-көтө бэйэлэрин оҕо саастарын санаан, уһуйааннарын ахтан бэрт көхтөөхтүк кыттыбыттара.
Түмүк тахсыыта уонна долгутуулаах түгэммит бу дьыл сэтинньи 26 күнүгэр буолла. Дьокуускай куорат Оҕо дыбарыаһын киэҥ уораҕайыгар “Солнышко” уһуйаан сэбиэдиссэйэ Снежана Васильевна Ильина күрэх тэрийээччилэр илиилэриттэн махтал сурук уонна кыайыылаах дьиэ кэргэттэрбит наҕараадаларын тутан, кыайыы өрөгөйүттэн «Солнышко” коллектива үөрдүбүт. Күрэххэ республика араас муннуктарыттан 1000 тахса дьиэ кэргэн кыттыбытын иһиттибит уонна кыайыылаахтар истэригэр киирбиппититтэн киэн тутуннубут. Күрэххэ кыттыбыт дьоммутун барыгытын эҕэрдэлиибит, күүс-көмө буолан, тэҥҥэ кэтэсиһэн, мунчаарсан биһигинниин буолбуккутунан махтанабыт.
Түгэнинэн туһанан, кыайыылаах Альберт Егоров, Ирина Елисеева, Екатерина Николаева дьиэ кэргэттэригэр эҕэрдэ эгэлгэтин эттэхпит буолуохтун, дьиэҕитигэр ил-эйэ эҥэрдэстин, доруобай буолуҥ, оҕолоргут ситиһиилэринэн кынаттана сылдьыҥ, оҕолорбут Марик, Борис, Тускулаана Егоровтар, Амир уонна Ангелина Еремеевтар, Амелия уонна Максимилиан Николаевтар «Солнышкоҕа” сылдьыбыт кэмнэрин олус сылаастык санаатыннар.
Вера Васильева, “Солнышко” уһуйаан сүрүн иитээччитэ