Сайсаар уокуругар элбэх хайысхалаах спортивнай саала президент көҕүлээбит «Демография» национальнай бырайыакка олоҕуран, «Спорт – олох нуормата» бырагырааманан тутуллан бүтэн эрэр.
«Бу элбэх хайысхалаах спортивнай саала базатыгар Дьокуускай куорат 9 №-дээх оҕо спортивнай оскуолатын арыйыахпыт. Манна, бастакы этээскэ, 400 киһи олорор миэстэлээх бары спорт көрүҥүгэр табыгастаах саала, иккис этээскэ боксанан дьарыктанарга сөптөөх саала, эрчиллэр, дьарыктанар саала, быраас, судьуйа уонна көрдөрөр-иһитиннэрэр эйгэ үлэһиттэригэр аналлаах хостордоох. Быйыл күһүн аанын арыйан, үлэтин саҕалыаҕа», — диэн Дьокуускай куорат физическэй култуураҕа уонна спортка управлениетын салайааччыта Эдуард Ефимов иһитиннэрдэ.
«Азия оҕолоро» VIII Норуоттан икки ардыларынааҕы спортивнай оонньууларга саҥа саалаҕа волейбол күрэҕин бастакы түһүмэҕэ ыытыллыаҕа. Маны сэргэ Дьокуускай куорат 8 оҕо-ыччат спортивнай оскуолаларын эбийиэктэригэр өрөмүөн үлэлэрэ ыытылыннылар. Спорт министиэристибэтигэр иһитиннэрбиттэринэн, 3 №-дээх Оҕо спортивнай оскуолатыгар муостата тилэри уларытыллан, уот, уу ситимнэрэ саҥардыллан, киирии аана оҥоһуллан, душ уонна таҥас уларыттар кабинкалар, трибуна, баһаарынай сигнализация, доруобуйаларынан хаарчахтаах дьон сылдьарыгар табыгастаах пандус бүтүннүү уларытыллан, истиэнэлэри тупсарыы үлэтэ ыытыллан, өрөмүөн үлэтэ түмүктэнэн эрэр. Антитеррор уонна видеонан көрүү систиэмэтэ туруоруллара хаалан турар.
«Биһиги оскуолабыт бу дьиэҕэ 2001 сыллаахха көһөн кэлбитэ. Онтон ыла 2016 сыллаахха эрэ өрөмүөннэнэнн турардаах. Быйыл эрэ улахан өрөмүөн үлэтэ ыытылынна», — диэн оскуола дириэктэрэ Василий Уйгуров санаатын үллэһиннэ.
Саха сиригэр бу спортивнай оронньуулары ыытыллаллара спорт эйгэтин эбийиэктэрэ саҥардыллалларыгар, тупсарыллалларыгар, эбии тутуллалларыгар кыаҕы биэрэр. Ол курдук, үс улахан эбийиэк тутулунна: Хатаска уонна Сайсаар оройуонугар элбэх хайысхалаах спортивнай комплекстар, «Дохсун» спортивнай комплекс базатыгар скалодром оҥоһулунна. Ону тэҥэ өссө 9 эбийиэккэ капитальнай өрөмүөн барда.
1996 сыллаахха «Азия оҕолоро» спортивнай оонньуу ыытыллар буолуоҕуттан ыла бу оонньууларга спортсменнары бэлэмниир аналлаах 20 эбийиэк араас сылларга тутуллубута. Олортон үгүстэрэ спорт эйгэтин эбийиэктэрэ — Николай Тарскай аатынан «Туймаада» стадион уонна «Эллэй Боотур» муус дыбарыаһа, «Долгун» бассейн, «Юность» стадион, «Модун» уонна «Дохсун» спорт комплекстара, «Триумф» спортивнай бэлэмнэнии киинэ, «Чолбон» бассейн уо.д.а. Ону тэҥэ оонньууларга бэлэмнэнии үлэтин чэрчитинэн Дьокуускай куорат аэровокзала, ХИФУ уопсайа, «Полярная звезда» (билигин «Азимут»)гостиница баар буолбуттара.
«Азия оҕолоро» VIII норуоттар икки ардыларынааҕы оонньуу бэс ыйын 25 күнүттэн от ыйын 7 күнүгэр диэри ыытыллыаҕа. 3,5 тыһыынчаттан тахса ыалдьыт кэлэрэ күүтүллэр, онтон 2,6 тыһыынча кэриҥэ спортсмен. Дойду Президенэ Владимир Путин «Азия оҕолоро» оонньууну оҕо-ыччат эйгэтигэр интэриэһинэй уонна түтүө түмүктээх бырайыаактартан биирдэстэрэ буоларын бэлиэтээн турар. Онтон Ил Дархан Айсен Николаев «бу спортивнай оонньуулар дойду үрдүнэн 2024 сылга ыытыллыбыт спорт ивнай тэрээһиннэртэн биир бөдөҥнөрө буолуоҕа уонна үрдүк таһымҥа ыытыллыаҕа» диэн эппитэ.
СӨ Бырабыыталыстыбатын уонна Ил Дархан пресс-сулууспатын матырыйаалыттан
Спорт министиэристибэтин пресс-сулууспатын хаартыскалара
