Бүгүн, Дүллүкүтээҕи бибилэтиэкэ «Саха Өрөспүүбүлүкэтин муниципальнай модельнай библиотеката» диэн статуһу сүкпүт үөрүүлээх тэрээһинэ буолла.
Өрөспүүбүлүкэ бюджетыттан бэриллэр субсидияны ылыыга күрэххэ кыайан, бибилэтиэкэ дьонун-сэргэтин тупсан көрүстэ. Ол үп-харчы тохсунньуга түһэн, бибилэтиэкэ көстүүтэ уларыйда: саҥа мебель арааһа, кинигэ стеллажтара, олоппостор, кафедра, остуоллар, аныгы тэтимҥэ эппиэттиир интерактивнай панель, үс моноблок, саҥа вывескалар, разделителлар. Маны таһынан, Дүллүкү нэһилиэгин дьаһалтатын, депутаттарын өйөөһүнүнэн, дьиэ үрдүн аныгылыы ( натяжной потолок) оҥорон, дьиэ иһэ биллэрдик сырдаата, кэҥээтэ.
Дүллүкү бибилэтиэкэтигэр 2015 сылтан кииннээммит библиотечнай ситим биир бастыҥ үлэһитэ Яна Борисова таһаарыылаахтык үлэлиир. Олохтоохтор, нэһилиэк тэрилтэлэрин бэрэстэбиитэллэрэ үөрүүлээх тэрээһиҥҥэ көхтөөхтүк кытыннылар. Модельнай бибилэтиэкэ буолбутун туоһулуур ааты – суолу (вывесканы) нэһилиэк баһылыга Николай Романов, Кииннэммит библиотечнай ситим дириэктэрэ Тамара Саввинова, бибилэтиэкэ сэбиэдиссэйэ Яна Борисова уонна Дүллүкүтээҕи сынньалаҥ киинин уус-уран салайааччыта Наталья Петрова ыйаатылар.
Тэрээһиҥҥэ П.Н. Тобуруокап хоһоонун Дүллүкү оскуолатын үөрэнээччилэрэ ааҕан киэргэттилэр, минньигэс алаадьынан, быырпаҕынан «Алгыс» түмсүү далбар хотуттара айах туттулар, ылбаҕай ырыатынан Константин Романятов эҕэрдэлээтэ.
Дүллүкү модельнай бибилэтиэкэтин дьиэтэ элбэх ааҕааччы, кэнчээри ыччат сырдыкка-кэрэҕэ талаһар, махталынан ахтар уйата буолуохтун.
Тамара Саввинова,
Киин бибилэтиэкэ дириэктэрэ
