«Солнышко» уһуйаан “Эрэммэт далаһаҕар үктэнимэ” диэн оҕону сэрэхтээх буолууга иитэр-үөрэтэр бырайыак чэрчитинэн уонна социальнай бииргэ үлэлэһиинэн, маны таһынан “Безопасное детство” акция чэрчитинэн ОГПС-12 Иранна Егоровна, ГИБДД Петр Иннокентьевич, оҕо библиотекатыттан Майя Федоровна уонна Екатерина Револьевна, биһиги иитиллээччилэрбитигэр кэлэн ыалдьыттаатылар. Кинилэр “Сэрэҕэ суох уһун өрөбүллэр” тиэмэнэн баһаары сэрэтиини, суол быраабылаларын уонна дьиэҕэ соҕотох, биитэр уулуссаҕа мунан хаалар түгэҥҥэ, туора дьону кытары алтыспат буолууну тула бэсиэдэ ыыттылар. Маны барытын кэпсэтии, оонньуу, остуоруйа, олоҥхо нөҥүө көрдөрөн, билиибитин чиҥэтиннибит, үөрүйэхпитин хаҥатынныбыт.
Оҕолорго атын тэрилтэ дуоһунастаах үлэһиттэрэ кэлэн, этэн-тыынан, кэпсээн, сиһилии ырытан биэрэллэрэ оҕо өйүгэр-санаатыгар чиҥник киирэрэ саарбаҕа суох. Сэрэхтээх буолуу – олохпут ирдэбилэ буолан турар, ол да быһыытынан оҕо оҥоруон иннинэ үчүгэйдик толкуйдаан, сыныйан, куһаҕаны уонна үчүгэйи араара үөрэммит буолуохтаах. Бу биһиги үлэбит биир сүрүн соруга буолар.
Көрсүһүү аҥардас кэпсэтиинэн эрэ муҥурдаммата. Оҕолор бэйэлэрин билиилэрин, сатабылларын, үөрүйэхтэрин уруһуй, аппликация нөҥүө кэпсээтилэр. Ол курдук, ОГПС-12 үлэһиттэригэр «Төрөөбүт айылҕабын харыстыам», “Спички детям не игрушка” диэн тиэмэлээн оҥорбут оҥоһуктарын бэлэх ууннулар. Онтон ГИБДД үлэһитигэр “Суол быраабылатын тутус” диэн бары оҥорбут оҥоһуктарын туттардылар. Оҕо библиотекатын үлэһиттэрэ оҕолорго уонна иитээччилэргэ Николай Якутскай остуоруйаларын бэлэх ууннулар. Биир дойдулаахпыт айымньыларын үөрэтэн, инсценировка туруоран, аны саас буолар күрэххэ бэлэмнэнии үлэтэ күүтэр.
Ити курдук туруоруммут сыалбытын уонна соруктарбытын ситэри толорон, оскуолаҕа барар иитиллээчилэрбит, үөрэнэрдии эрэ буолбакка, олох быраабылаларын билэр уонна доҕотторун үтүөҕэ үөрэтэр дьон буола улаатыахтара диэн баҕа санаабыт туолуохтун.
Түгэнинэн туһанан, социальнай бииргэ үлэлэһэр дьоммутугар кэлэн иһэр 2024 сылынан эҕэрдэ эгэлгэтин эттэхпит буолуохтун. Баҕа санааҕыт барҕара сайда, ыра санааҕыт ыпса турдун.
Вера Васильева, “Солнышко” уһуйаан сүрүн иитээччитэ
