Саха сиригэр сыл саҕаланыаҕыттан, хотугу улуустары хабан туран, 215 тыһыынча 75 оҕо медицинскэй көрдөрүүнү ааһан, уопсай сыллааҕы былаан 101,6% туолбут.
«Маннык ыарыыны эрдэттэн сэрэтэр медицинскэй көрүүнү доруобуйатын туругуттан тутулуга суох хас биирдии оҕо ааһар. Хотугу улууска олорор оҕолор доруобуйаларын туругун мобильнай биригээдэлэр көрдүлэр. Бу биригээдэ быраастара хас биирдии нэһилиэнньэлээх пуун, кырыы сытар суола-ииһэ суох учаастакка тиийэ сылдьан үлэлээтилэр.
«Национальнай медицинэ киинин специалистарыттан турар анал биригээдэ тэриллэн, оҕо уролог-андролога, оҕо эндокринолога курдук сэдэх хайысхалаах быраастара суох улуустарга сырыттылар», — диэн СӨ Доруобуйа харыстабылын миниистирэ Лена Афанасьева бэлиэтээтэ.
Нэһилиэнньэҕэ босхо ыытыллар диспансеризация Дойду Президенэ Владимир Путин көҕүлээһининэн үлэлээбит «Доруобуйа харыстабыла» национальнай бырайыак тэрээһиннэрин былаанынан ыытыллар.
2024 сыл Россия Президенэ Владимир Путин Ыйааҕынан Дьиэ кэргэн сылынан, оттон өрөспүүбүлүкэҕэ Ил Дархан Айсен Николаев Быһаарыытынан Оҕо саас сылынан биллэриллибитэ. Санатар буоллахха, Саха сирэ демография өттүгэр көрдөрүүлэрэ дойдуга бастакы кэккэҕэ сылдьар. Уһук Илиҥҥи уокурукка Сахабыт сирэ 8 ый түмүгүнэн оҕо төрөөһүнүгэр эмиэ бастакы миэстэни ылары ситистэ. Ол курдук, бу сыл 11 ыйын устата 9834 кырачаан күн сирин көрбүт, онтон уола — 4994, кыыһа -4840.
Ил Дархан уонна Барбыыталыстыба пресс-сулууспатын матырыйаалыттан
Поделиться: