“Фантастика уонна дьиҥ олох уһугар” — Дьокуускай куоракка экстремальнай циркэ перфоманса.

«МАМОНТенок-2024» норуоттар икки ардыларынааҕы циркэ бэстибээлин чэрчитинэн, от ыйын 4 күнүгэр киэһэ 8 чааска экстремальнай ураты көрдөрүү буолаары турар. Саха сирин историятыгар аан бастаан Марфа, Сергей Расторгуевтар ааттарынан Судаарыстыбаннай циркэ артыыһа Таалай күөл үрдүнэн тардыллыбыт канаат устун хаамыаҕа.

Акробат уһун ураҕас туппутунан, страховката суох, 4-5 миэтэрэ үрдүгүнэн тардыллыбыт канат устун хаамыаҕа. Бу аһаҕас халлаан анныгар, Дьокуускайга хаһан да буола илик экстремальнай нүөмэр. «На грани фантастики и реальности» диэн ааттаах перфоманс буолар. Ол иннинэ, чаас аҥаарын устата, биһиги артыыстарбыт муостаҕа араас нүөмэрдэри көрдөрүөхтэрэ. Онон дьиэ кэргэнинэн сынньана таарыйа, ураты нүөмэри кэлэн көрөргүтүгэр ыҥырабыт! — диэн Саха циркэтин дириэктэрэ Сергей Расторгуев кэпсээтэ.

Санатан эттэххэ, «МАМОНТенок-2024» норуоттар икки ардыларынааҕы циркэ бэстибээлэ бэс ыйын 27 күнүттэн от ыйын 7 күнүгэр диэри ыытылла турар. Бэстибээл чэрчитинэн циркэҕэ гала-кэнсиэртэр, испэктээкиллэр буолуохтара. Беларусь, Кытай өрөспүүбүлүкэлэриттэн, Болгарияттан, Бурятияттан, Таджикистантан, о.д.а. судаарыстыбаннай циркэлэр кэлэн кыттыахтара. 10 дьүүллүүр сүбэ чилиэнэ, 50-ча артыыс кэлэн бэлэмнэнэ сылдьаллар.

«Үөһээ Бүлүү» хаһыат.