Уһулуччулаах салайааччы, биллиилээх бэлиитик, ССРС, САССР үрдүкү сэбиэттэрин дьокутаата, ССКП Саха сиринээҕи обкомун сэкирэтээрэ, 1955-1958 сс. ССКП Үөһээ Бүлүүтээҕи райкомун 2 сэкирэтээрэ Гавриил Иосифович Чиряев төрөөбүтэ 100 сылын көрсө улуус дьаһалтатын аактабай саалатыгар үөрүүлээх тэрээһин буола турар.
Тэрээһиҥҥэ Бүлүүттэн ыалдьыттар кэллилэр, ол курдук Еремей Константинович Чиряев, үөрэхтээһиҥҥэ СӨ үтүөлээх үлэһитэ, Светлана Васильевна Чиряева, СӨ бочуоттаах казначейа, Ефросинья Егоровна Иванова, норуоту үөрэхтээһиҥҥэ РСФСР туйгуна, Кыадаҥда олохтооҕо, Варвара Октябриевна Чиряева, К.Чиряев аатынан Кыадаҥдатааҕы оскуола–уһуйаан учуутала Оксана Ивановна Кычкина, Дьоруой Н.Степанов аатынан Бүлүү 3 №-дээх орто скуолатын учуутала, Прасковья Иосифовна Чиряева кийиитэ, уола Алексей кэргэнэ Алексеева Параскева Алексеевна, Прасковья Иосифовна Чиряева сиэнэ, уола Алексей кыыһа кыттыыны ылаллар.
Улуус баһылыгын социальнай боппуруостарга солбуйааччы Анна Уларова, Үөһээ Бүлүү нэһилиэгин баһылыгын сүбэһитэ Георгий Степанов Гавриил Иосифович Чиряев чаҕылхай олоҕор сүгүрүйэн туран, кини олоҕун-дьаһаҕын, Үөһээ Бүлүүгэ үлэлээбит сылларын туһунан дакылаат оҥордулар. Итиэннэ ыҥырыылаах ыалдьыттар кини үлэлэрин үөрэппит дакылааттарын аахтылар. Ол курдук, педагогическай үлэ бэтэрээнэ, ытык саастаах киһибит Ульяна Терентьевна Тимофеева улуус үөрэҕин сайдыытыгар, нэһилиэнньэни үөрэхтээһиҥҥэ быһаччы сибээстээҕин, сүдү кылааттааҕын ыйда.
Саалаҕа улуустааҕы киин библиотека хомуйан туруорбут кинигэ, архыып докумуоннарын көрүөххэ, элбэҕи билиэххэ сөп.
Бу күн тэрээһин кыттыылаахтара Гавриил Чиряев Үөһээ Бүлүүгэ үлэлии сылдьыбыт сылларын туһунан ахтыытын, бу сиртэн-уоттан үүнэн тахсыбытын, уопут ылбытын туһунан махтана саныырын кэпсиирин истэн долгуйдулар.
Мария Васильева,
«Үөһээ Бүлүү» хаһыат