«Хоһоон суһума» биэриигэ кыттыбыт Николай Васильев-Харыйалаах уола

«Хоһоон суһума» барылга кыттыбыт биир дойдулаахпыт Россия суруйааччыларын Сойууһун чилиэнэ, Саха сирин эдэр литератордарын салайааччыта Николай Васильев-Харыйалаах уолун кытта кэпсэттибит.

Николай Васильевич, дорообо! Бастатан туран, «Хоһоон суһума » саха поэзиятын барылыгар ситиһиилээхтик кыттан «Таабырыннаах ааҕыы» анал аат  ылбыккынан эҕэрдэлиибин.

Биһиги, тыа дьоно, өрөбүл күн буолла да хоһооммут күрэҕин кэтэһэн киэн тутта көрөбүт. БиҺиги, үөһээ бүлүүлэр, уолбут Николай Васильев — Харыйалаах уола кыттарыттан астынабыт. Поэзия ис дьиҥэ уустугун итиннэ биллим, биэрии түмүгэр анал ырытыыны көрөн «сөхтүм».

Бу быйыл «Саха» НКИХ  каналыгар «Хоһоон суһума» барылга кыттыын туһунан кэпсииргэр көрдөһөбүн. Бу манна бааллар Өрөспүүбүлүкэ биллиилээх, ааттаах — суоллаах суруйааччылара, артыыстара.
Хайдах күрэххэ сүүмэрдэнэн киирдиҥ, хас түһүмэх буолла?

— Арассыыйа суруналыыстарын Сойууһун чилиэнэ Маргарита Иванова-Дайар Суһум 2017 сыллаахха «Хоһоон суһума» диэн сүрэхтээбит бырайыага телевидениеҕа көһөн, НВК-ҕа СЭРГЭХ СҮПСҮЛГЭН буолан үгүс көрөөччү болҕомтотун тарта.
Биэрии режиссерунан «Саха» НКИХ бэлиэ үлэһитэ Саймон Сергеев, продюсер – Лена Керемясова уонна редактор — Саргылана Семеновна Лебедева буоланнар күүскэ үлэлээтилэр. Бу бырайыакка барыта тоҕус поэт биирдии кынат ааҕааччыны кытта бэриллибит хайысхаҕа хоһооннору уустаан-ураннаан ааҕарга холоммуттара. Тоҕус кыттааччы истэригэр мин эмиэ баарым…
Барыл ааптара Дайар Суһум, бырайыак төһө эмит буолуон иннинэ, төлөпүөнүнэн кэпсэтэн-билсиһэн баран кыттыыны ыларбар ыҥырбыта. Айар эйгэҕэ сыста, чугаһыы сатыыр киһи үөрүүнэн сөбүлэстэҕим. Эбиитин, тэрилтэм салайааччыта Айталыына Петровна үлэбиттэн көҥүллээн, дьиэ кэргэним дьоно тэрийэн ыытаннар ордук төһүү күүс буоллулар. Дьэ, онон 5 нэдиэлэ былаһын тухары айантан айаҥҥа сырыттым.
Бырайыакка үс киһилээх дьүүллүүр сүбэ эрэ буолбакка, ырытар-көрөр үлэлээх Сүбэ үлэлээтэ. Хоһоон айааччыларга бэйэлэригэр туһалаах буолуоҕа диэн санааттан, быһаччы сыана туруорбакка, биэрии ахсын ааҕыллыбыт хоһооннору ырытан биэрдилэр.


Ол курдук, Сахабыт сирин араас улууһуттан уонна куорат олохтоохторо буолан кытынныбыт. Тус бэйэм, бу бырайыак күрэхтэһии буолбакка, тохсуо бэйэбитин «туомту тутан», «тэҥ баайыылаан» ыытыллыбытыттан толору астынным. Хоһоону суруйардааҕар, дьон иннигэр ааҕар уустугун, дьэ, биллим.
Биэс биэрии устата, биир эйгэлээхтэрбин кытары ыксалаһан бэккэ кытынным. Бырайыак түмүгэр, дьоһун бэлэҕи кытары, «ТААБЫРЫННААХ ААҔЫЫ» диэн анал аат хаһаайына буолбуппун туоһулуур суругу, Саха тэлэбидиэнньэтин директорыттан — Олег Колесовтан тутаммын олус үөрбүтүм.
Саха Сирэ бүтүннүүтэ көрөр  «Саха» НКИХ каналыгар уһуллубуппуттан, ону таһынан олус үчүгэйдик кыттан, төрөөбүт-үөскээбит Кэнтикпин, сөбүлээн ахан иккис дойду оҥостон олохсуйбут Дүллүкүбүн уонна тапталлаах Үөһээ Бүлүүм улууһун бүтүннүү «ааттаппыппыттан» бэйэм муҥура суох үөрэбин.


— Николай Васильевич сиһилии олус үчүгэй кэпсээнин иһин махтанабын. Саҥаттан саҥа барылларга кытта тур, саҥаттан саҥа хоһооннору суруйа тур уонна саҥа хоһооннорун хомуурунньуга бэчээккэ таҕыстын! Биир тылынан ай-тут, саха поэзията сайда турарыгар!

Кэпсэттэ Нина Ильина

Читайте дальше