2024 сыл Россияҕа «Дьиэ кэргэн сыла», Саха Өрөспүүблүкэтигэр «Оҕо саас сыла, Үөһээ Бүлүү улууһугар “Түмсүү сыла” биллэриллибитинэн улууспутугар аан маҥнайгы «Ийэм, аҕам уонна мин – спортивнай дьиэ кэргэн» күрэх ыытылынна. «Үс хоһуун» спортивнай комплекска үөрэх управлениета уонна «Сказка» оҕо сайдар киинэ төрөппүттэргэ уонна оҕолорго аналлаах сүрдээх тыҥааһыннаах тэрээһини ыыттылар.
Манна барыта тоҕус ыал кытынна. Мэйик уһуйааныттан икки ыал: Заура Васильевна, Аян Николаевич Андреевтар кыыстара, 6 саастаах Аделиналыын, уонна Раиса Николаевна, Василий Владимирович Павловтар уоллара, 5 саастаах Сулустаанныын; Кэнтик нэһилиэгин «Сайыына» уһуйааныттан Клара Никитична, Павел Павлович Константиновтар кыыстара Аделиялыын; бастакы нүөмэрдээх «Ньургуһун» уһуйааныттан Вера Дмитриевна, Леонтий Иннокентьевич Татариновтар уоллара, 7 саастаах Харысханныын; иккис нүөмэрдээх «Теремок» уһуйааныттан Владилана Владимировна, Артем Игоревич Кебельлэр уоллара, 5 саастаах Амирдыын; алтыс нүөмэрдээх «Солнышко» уһуйаантан Изабелла Николаевна, Михаил Викторович Романятовтар уоллара Мирославтыын; үһүс нүөмэрдээх «Үрүйэчээн» уһуйаантан Альмира Даниловна, Юрий Васильевич Лебёдкиннар уоллара, 6 саастаах Арсентийдыын; Ороһу оскуола-саадыттан Татьяна Федоровна, аҕалара Прокопий Устинович Никоновтар кыыстара, 5 саастаах Ньургуйааналыын; сэттис нүөмэрдээх «Сказка» уһуйаантан Анисия Петровна, Иван Александрович Перовтар дьиэ кэргэттэрэ кыыстара, 5 саастаах Алисалыын уһуйааннарын чиэһин көмүскээтилэр.
Күрэх кыттыылаахтарын улуустааҕы «Оккоолойдоон оккоолой» ырыа күрэҕин 2-с степеннээх лауреата, «Сказка» оҕо сайдар киинин иитиллээччитэ, баара-суоҕа биэс саастаах Ефимов Айхал «Тугутчаан» ырыанан эҕэрдэлээтэ.
Улуустааҕы үөрэх салалтатын начальнигын солбуйааччыта Платонов Николай Андреевич төрөппүттэргэ, оҕолорго ситиһиини баҕаран туран: «Кыахтаах кыайдын, онтон хотторбут олох хомойботун, инникитин өссө дьаныһан туран кыайыыга талаһыа», — диэн алҕаан эҕэрдэ тылын түмүктээтэ. «Үс хоһуун» спортивнай комплекс начальнига Егор Алексеевич: «Элбэх хамаанда кытта кэлбит, куруук маннык спорду өрө тута сылдьаргытыгар баҕарабын», — диэн тыл эттэ. Оскуолаҕа киириэн иннинээҕи саастаах оҕолорго отдел специалиһа Васильев Владимир Вадимович кыттаачыларга махтанан туран, ситиһиини баҕарда.
Күрэхпит судьуйаларынан Үөһээ Бүлүү улууһун хотугу многоборьеҕа тренера Григорьева Раиса Васильевна уонна «Сказка» оҕо сайдар киинин физкультураҕа инструктора Иванова Ульяна Капитоновна үлэлээн, күрэҕи иилээн-саҕалаан ыыттылар, сыаналаатылар.
Барыта аҕыс түһүмэхтээх күрэх буолла. Бэйэни билиһиннэрииттэн саҕалаан сыал быраҕыы, ыйытыктарга эппиэттээһиннэр, скакалканан ыстаныы, көрдөөх эстафета уонна да атын күрэхтэр бэрт сытыытык ыытылыннылар.
Уһун тыҥааһыннаах киирсии кэнниттэн маннык миэстэлэр быһаарылыннылар: бастакы миэстэҕэ – “Теремок” уһуйаантан Кебель, иккис бочуоттаах миэстэҕэ – Кэнтик нэһилиэгин “Сайыына” уһуйааныттан Константиновтар, үһүс бириистээх миэстэҕэ – “Сказка” уһуйаантан Перовтар дьиэ кэргэттэрэ таҕыстылар. Манна даҕатан эттэххэ, Мэйиктэн кэлбит саамай саастаах Павловтар дьиэ кэргэттэригэр “Кыайыыга дьулуурдарын иһин” диэн “Сказка” уһуйаанын анал бирииһинэн наҕараадаланнылар.
Өссө төгүл күрэхтэспит ыалларбытыгар махтанан туран тус олохторугар, үөрэхтэригэр үрдүк ситиһиилэри, көрдөрүүлэри баҕарабыт!
Евгения Кучарова, «Cказка» оҕо уһуйаанын методиһа
“Үөһээ Бүлүү” хаһыат