Улуустааҕы бэтэрээннэр Сэбиэттэрин бэрэссэдээтэлэ, СӨ Норуотун хаһаайыстыбатын үтүөлээх үлэһитэ Иван Чычахов:
«Ааспыт сыл көрдөрүүтүнэн Өрөспүүбүлүкэбит түргэн тэтиминэн сайдыбыта киһини сөхтөрдө. Ил Дархан иһитиннэриитин сөбүлүү иһиттим.
250 дьоһуннаах объектар тутуллан киирбиттэрин наһаа сөхтүм. Ол аата биир сылга, биир сууккаҕа 1 объект тутуллан киирэр эбит. Хайдахтаах курдук сайдыыный?
Саха оҕотун сайыннарыытыгар элбэх үлэ ыытыллар эбит. Кэлэр сылы Айсен Сергеевич Оҕо сылынан биллэрдэ. «Азия оҕолоро» — өрөспүүбүлүкэ төрүттээбит оҕолор олимпиадалара Саха сиригэр буолаары турарыттан наһаа астынным, киэн тутуннум.
Хоту дойду олохтоохторо үлэлииллэригэр, олороллоругар үгүс үлэ барбыт. Табаар, бородуукта таһыытыгар үгүс үлэ ыытылынна, олоххо киирдэ — ол улахан ситиһии буолар.
Өрөспүүбүлүкэбит олохтоохторун ахсаана 1 мөлүйүөнү арыый куоһарбыт. Саха сиригэр араас омук олорор, бу норуоттар ытыктыһан олороллоругар элбэх үлэ ыытыллар.
Барыта — санаа хоту!»
«Тускул» оҕо айымньытын киинин дириэктэри солбуйааччы Мария Волкова:
«Кэлэр Оҕо саас сыла хас биирдии оҕо талаанын, дьоҕурун арыйарыгар элбэх саҥа былааннары киллэрэрбитигэр төһүү күүс буолуо диэн эрэнэбит!»
2-с нүөмэрдээх «Теремок» оҕо уһуйаанын сэбиэдиссэйэ Василий Константинов:
«Кэлэр сылы Ил Дархаммыт Оҕо сылынан биллэрбитин биһиги уһуйааммыт үлэһиттэрэ үөрэ иһиттибит.
Кэлэр 2024 сылга сыалбытын, тосхоллорбутун сөптөөхтүк былааннанарга санаабытын ууруохпут.
Оҕолор доруобуйаларын бөҕөргөтүүгэ күүстээх үлэ барыахтаах. Ол курдук, элбэх битэмииннээх аһы аһааһын, эт -хаан сайдыытыгар сөптөөх эйгэни тэрийии.
Үлэ, спорт, экология өттүгэр сайыҥҥы сынньалаҥы сөптөөхтүк тэрийдэххэ оҕолорбут сынньалаҥнарын туһалаахтык атаарыа этилэр».