«Мин бастакы хамнаһым» социальнай бырайыагынан 2024 сыл сайыныгар 119 оҕо үлэнэн хааччыллыбытын туһунан Үөрэх уонна билим министиэристибэтигэр иһитиннэрдилэр.
Бу ааһан эрэр сыл бэс ыйыгар үлэтин саҕалаабыт бырайыак социальнай өттүнэн уустук балаһыанньаҕа киирбит итиэннэ кыһалҕалаах олохтоох дьиэ кэргэттэр оҕолоро үлэ булалларыгар уонна идэни сөпкө талалларыгар көмө буолуохтаах.
«Оҕолор инники олохторун санаан, билиҥҥэттэн үлэҕэ сыһыаран, хамнас аахсарга үөрэнэллэригэр кыах биэриэхтээхпит. Бырабыыталыстыба өттүттэн улаатан эрэр оскуола оҕолоро дьарыктаах буолалларыгар анаммыт социальнай хантыраак курдук үлэлиир «Мин бастакы хамнаһым» диэн пилотнай бырайыак оҥоһуллан, 2024 сыл бэс ыйын 1 күнүттэн үлэлиэхтээх», – диэн Айсен Николаев эппитин кэннэ, ыйыллыбыт болдьоххо үс муниципальнай тэриллиигэ бу бырайыак үлэтин саҕалаабыта. Ол курдук, Дьокуускай куоракка,Горнай уонна Мэҥэ-Хаҥалас улуустарыгар.
119 оскуола оҕото сайыҥҥы сынньалаҥнарын кэмигэр үлэ булан хамнастаммыттара. Дьокуускай куоракка 62 үөрэнэччи, ол иһигэр 54 оҕо социальнай өттүнэн уустук балаһыанньалаах олохтоох дьиэ кэргэнтэн уонна 8 тулаайах оҕо араа стэрилтэлэргэ уонна 4 оҕо креативнай индустрия эйгэтигэр үлэлээбиттэрэ.
«Мин бастакы хамнаһым» социальнай бырайыак Ил Дархан сорудаҕынан кэлэр сайыҥҥы сынньалаҥ кэмигэр салгыы үлэлиэҕэ. Оччотугар өссө элбэх ыччат оҕо үлэ уопутун ылыаҕа.
Андрей Сорокин хаартыскаҕа түһэриитэ, архыып