Ыам ыйын 19 күнэ — Владимир Ильич Ленин аатынан Бүтүн Сойуустааҕы пионерскай тэрилтэ олохтоммут күнэ.
Эдэр пионер андаҕарын нойосуус үөрэтэн, чиҥник билэн пионерга киирбит оччотооҕу оҕолорго бу күн чахчы да улахан суолталаах, олус кэтэһиилээх күн буолара.
Ол курдук пионерскай үлэ оскуолаҕа күргүөмнээхтик ыытыллара. Бу күн хаһан да умнуллубат сэргэх тэрээһиннэр — үөрүүлээх линейкаттан, речевкалаах строевой хаамыыттан саҕалаан, араас спортивнай күрэхтэһии, кутаа оттон күөс өрүнэн аһааһын, знамя таһаарыыта, «Взвейтесь кострами, синие ночи!» ырыабытын ыллаан ньиргитэн уһун күнү билбэккэ аһарарбыт, сибиэһэй салгыҥҥа сылдьарбыт үчүгэй даҕаны буолара, оҕо сааспыт умнуллубат бырааһынньыга этэ.
Пионердар кыһыл хаалтыспытын сүрдээҕин харыстыырбыт, килэрийэн көстүбэтин диэн сэрэнэн аҕай маарыла нөҥүө өтүүктүүрбүт.
Аалай кыһыл знамябыт уонна хаалтыспыт билиҥҥэ диэри харахпытыгар көстөр.
Оччолорго Мэйик 8 кылаастаах оскуолатыгар старшай пионербаһаатайынан Ильина Екатерина Васильевна, Варфоломеева Мария Васильевна үлэлээн ааспыттара.
Биһиги пионерскай этэрээппит Зоя Космодемьянская аатын сүгэрэ.
Биһиги кылаастан мин дружина советын председателэ этим, улахан эппиэтинэстээх дуоһунас — знамя тутааччы, барабан охсооччу, горн тыаһатааччы эмиэ биһиги кылаас уолаттара Туманов Виктор, Яковлев Аркадий, Васильев Афоня, Лукин Леня, Николаев Олимпий буолаллара.
Учууталларбыт Иванов Николай Яковлевич, Васильев Федот Иванович бэрткэ да тэрийэн, көҕүлээн Пионерия күнүн үрдүк таһымнаахтык ыыталлара.
Ильич сиэннэрэ биир сомоҕо буолан, пионерскай кэм барыбытыгар сырдык, ыраас эрэ өйдөбүлү хаалларбыта.
Бу үтүө үгэс сойуус үрдүнэн төһөлөөх элбэх оҕону түмпүтэ буолуой?
Күндү ааҕааччым, бүгүҥҥү Пионерия күнүн ахтан-санаан, пионер сааспыт кэрчик кэмнэрэ үчүгэй, кэрэ да кэмнэр эбит диэн түмүккэ кэлиэҕиҥ!
Аграфена Баишева
Дьокуускай
Ыам ыйын 19 күнэ 2024 сыл.
