Бүгүн, Өрөспүүбүлүкэбит Судаарыстыбаннаһын күнүгэр, Кэнтик нэһилиэгин уулуссаларыгар асфальт суолу үөрүүлээхтик арыйар сиэрэ-туома ыытылынна. «Тыа сирин биир кэлимник сайдыыта» РФ судаарыстыбаннай бырагырааматын «Тыа сиригэр транспорт, суол-иис сайдыыта» федеральнай бырайыагын чэрчитинэн Сэбиэскэй Сойуус дьоруойа Алексей Миронов аатынан уонна Кэнтик, Харыйалаах, Сэбиэскэй уулуссаларга аныгылыы тупсаҕай көстүүлээх асфальт суол уурулунна.
Асфальт суол үөрүүлээх арыллыытыгар СӨ тырааныспарын уонна суол хаһаайыстыбатын миниистирэ Владимир Сивцев, Үөһээ Бүлүү улууһун баһылыга Валерий Николаев, Кэнтик нэһилиэгин баһылыга Сергей Федотов, “РИК Автодор” АУо Ньурбатааҕы филиалын генеральнай дириэктэрин солбуйааччыта Сергей Никифоров, Кэнтик нэһилиэгин бочуоттаах олохтооҕо, педагогическай үлэ уонна спорт бэтэрээнэ Михаил Николаев, нэһилиэк олохтоохторо, кэнчээри ыччаттара кытыннылар.
Алгысчыт Трофим Миронов кэрэ Кэнтик нэһилиэгэр кэнэҕэһин да кэхтибэт кэскили олохсутар, үөрүү аартыгын арыйар аар алгыһын анаата. Сайдам түмсүү эбээлэрэ ыҥырыылаах ыалдьыттарга сахалыы сиэринэн алаадьыттан амсаттылар, быырпаҕынан күндүлээтилэр.
Асфальт суолу арыйар кыһыл лиэнтэни быспыттарын кэннэ, ыарахан уйуктаах массыыналар параадтаан киирдилэр, суол кытыытыгар турар олохтоохтор уруйдаан-айхаллаан көрүстүлэр. Салгыы ыалдьыттар олохтоохторго эҕэрдэ тыл маанытын эттилэр, суол оҥоһуутугар үлэлээбит туруу үлэһиттэргэ барҕа махталларын тиэртилэр. Ол курдук, СӨ тырааныспарын уонна суол хаһаайыстыбатын миниистирэ Владимир Сивцев махтал суруктарын “РИК Автодор” АУо Ньурбатааҕы филиалын үлэһиттэригэр Кирилл Спиридоновка, Станислав Татариновка, Альберт Петровка, Егор Дмитриевка туттарда. Махтал суруктары кинилэр ааттарыттан Сергей Никифоров тутта. Салгыы улуус баһылыга Валерий Николаев бар дьонун күүтүүлээх түгэнинэн эҕэрдэлээн туран, махтал суруктары “РИК Автодор” АУо Ньурбатааҕы филиалын үлэһиттэригэр Спиридон Ивановка, Альберт Егоровка, Егор Мироновка, Семен Петровка, Елисей Михайловка туттартаата.
Кэнтик нэһилиэгин саҥа талыллыбыт баһылыга Сергей Федотов үөрэн-көтөн туран махтал суруктары СӨ тырааныспарын уонна суол хаһаайыстыбатын миниистирэ Владимир Сивцевка, “РИК Автодор” АУо Ньурбатааҕы филиалын генеральнай дириэктэрин солбуйааччыта Сергей Никифоровка, Үөһээ Бүлүү улууһун баһылыгын солбуйааччытыгар Егор Ивановка, суол өрөмүөнүн учаастагын маастарыгар Егор Мироновка туттартаата.
Кэнтик нэһилиэгин олохтоохторун асфальт суол арыллыбыт үөрүүлээх түгэнинэн эҕэрдэлиибит!
“Үөһээ Бүлүү“ хаһыат
