Боотулуу нэһилиэгэр кулун тутар 4 күнүгэр улууспут баһылыга Валерий Валерьевич Николаев бэйэтин хамаандатын: Николаев Н.Н.- улуус дьокутааттарын Сэбиэтин бэрэссэдээтэлин, Гаврильев А.К. — олох-дьаһах коммунальнай хаһаайыстыбатын директорын, Боескорова Т.Д. — социальнай көмүскэл управлениетын сүрүннүүр исписэлииһин, Деллохов П.В. — тыа хаһаайыстыбатын управлениетын салайааччытын солбуйааччытын, Архипов Н.Д. — улуус мунньаҕын дьокутаатын кытта нэһилиэнньэлиин көрсүһүү оҥордо.
Кэпсэтиилэр көхтөөхтүк бардылар. Саҥа тутуллан киирэр оскуолаҕа Золотарев Николай Афанасьевич аатын биэрэргэ улуус мунньаҕын дьокутаата, историческай наука дуоктара Никита Архипов этиннэ, ону өйөөн ветеран учуутал Алексей Алексеевич Николаев Боотулуу нэһилиэгэр 1929- 1966 сс. учууталынан, дириэктэринэн, ону таһынан холкуос бэрэссэдээтэлинэн үлэлээн, олоҕун бүтүннүүтүн нэһилиэгин туһугар анаабыт Н.А. Золотарев аата Боотулуу устуоруйатыгар кыһыл көмүс буукубанан суруллуохтааҕын этиннэ. Салгыы Боотулууга тарированнай ГСМ, саҥа оскуола үлэҕэ киирдэҕинэ спортзал дьылҕатын, өртөөһүҥҥэ көҥүл туһунан, балбаах боппуруоһугар, ИП Федотов Р.Е. филиала Үөһээ Бүлүүгэ үлэлииригэр, улуус киинигэр үчүгэй хааччыллыылаах остолобуойдар, кафелар, туалеттар, гостиницалар наадаларын тустарынан, Боотулуу нэһилиэгэр саҥа оҕо уһуйаанын тутуллуутугар кыһамньы, балыыһаҕа, оскуолаҕа быраастар, учууталлар тиийбэттэринэн, нэһилиэккэ үчүгэй, толору хааччыллыылаах уопсайдар наадаларын, Боотулуу-Маҥаас суола оҥоһуллуутугар, Боотулуу –Тыалыччыма суола билиҥҥи туругунан ардахха бырыы да бадараан буоларынан, бырайыакка киллэрэргэ кэпсэтиилэр бардылар.
Түмүккэ баһылык Валерий Валерьевич нэһилиэк олохтоохторо актыыбынай кыттыыны ылбыттарыгар махтанна.
Алексей Николаев, педагогическай үлэ бэтэрээнэ
