Сэтинньи-Баай Барыылаах Байанай ыйа түмүктэнэн, чысхааннаах ахсынньы ыйбыт тиийэн кэллэ. Биһиэхэ, Хоротооҕу «Кэскил» уһуйааҥҥа, сэтинньигэ буолан ааспыт кэккэ сонуннарбытын билиһиннэрэбит.
Байанай – ойуур иччитэ, булт таҥарата. Кини тыа кыылларын, көтөрдөрүн харыстыыр. Ол иһин тыа кыылларын-көтөрдөрүн “Байанай оҕолоро” диэн ааттыыбыт. Сэтинньигэ булчуттар ыраах бултуу-алтыы бараллар, күндү түүлээҕи эккирэтэллэр, Байанайтан айах тутан көрдөһөллөр. “Оту-маһы алдьатыам суоҕа, наадыйарбын эрэ ылыам” диэн андаҕар этэллэр.
Улууска сылын аайы ыытыллар “Байанай” күрэх бастакы түһүмэҕэ эбэ уҥуор сытааччы уһуйааннарга быйыл Дүллүкү нэһилиэгэр буолла. “Хоро Кэскиллэрэ” хамаандабыт оҕолоро 2-с миэстэни ылан үөрэн-көтөн кэлбиттэрэ. Дүллүкү уһуйаанын оҕолоро улууска кыттар чиэскэ тиксибиттэрэ.
Уһуйаан улахан бөлөх оҕолоругар «Байанай» ыйын чэрчитинэн төрөппүттэргэ «Ойуур кыыллара» диэн уруһуй быыстапката буолла. Төрөппүттэрбит оҕолорунаан уруһуйдаабыт уруһуйдара киһини сөхтөрөр,саха киһитин талба талаанын көрдөрөр. Өбүгэлэрбит төрүт дьарыктарын — булт туһунан оонньуулары “Чуораанчык” бөлөх иитээччилэрэ Александра Анатольевна, Туйаара Валерьевна билиһиннэрдилэр. Уһуйааммыт иһинэн тэриллибит «Өбүгэ түмэлигэр» эбии булт тэриллэрин хомуйдубут. Оҕолорго интэриэһинэй булт тэриллэрин билиһиннэрэн психолог-педагог Галина Семеновна сэһэргээтэ.
Уол оҕо айылҕаттан булка-балыкка тардыстар айдарыылаах. Кинини кыра эрдэҕиттэн тыаҕа илдьэ сырыттахха, өбүгэлэрбит үгэстэрин, булт сиэрин-туомун үөрэттэххэ, үтүө булчут, балыксыт буола улааталлар. Бултааһын — норуот былыргыттан илдьэ кэлбит үгэһэ, дьарыга буолар. Саха киһитэ булчут буолар. Кини сылбырҕа, мүччургэннээх кэмҥэ уолуйбат, киэн, холку көҕүстээх, наада буоллаҕына быһаарыныылаах, күүстээх-уохтаах, сырыыны-айаны тулуйар, хорсун, эр санаалаах буолар диэн улахан бөлөх оҕолоругар Байанай ыйыгар «А5ам миэнэ Байанайдаах булчут» диэн оҕолорго дакылаат күрэҕэ бэрт кэрэхсэбиллээхтик буолан ааста. Уопсайа 9 дьиэ кэргэн кытыннылар.
“Уол оҕо кыракый булчут” диэн спортивнай курэххэ улахан бөлөх оҕолоро хамаанданан арахсан кытыннылар, оҕолор эт-хаан өттүнэн чэбдигирэн нэдиэлэни түмүктээтилэр.
Кэрэни кэрэхсиир муусука дьарыгар Альбина Александровна “Күнчээн” орто бөлөх оҕолоругар “Ким хайдах саҥарарый?” диэн кыыл саҥатын араара үөрэниигэ сайыннарыылаах оонньуутугар оҕолор дуоһуйа оонньоотулар. Бу бөлөх иитээччитэ Тамара Владимировна оҕолор төрөппүттэрин кытта “Ойуур кыылларын туһунан таабырыннар” диэн сүрдээх баай ис хоһоонноох кинигэ оҥордулар. “Сахалар төрүт дьарыкпыт” диэн муҥха туһунан көрдөрөн кэпсэтээһини Айталина Васильевна сырдатта. Кырачаан оҕолор тылларын саппааһын байытарга муҥха туһунан маҥнайгы өйдөбүлү тириэртэ.
Уһуйааммыт иитээччилэрэ Сахая Валерьевна, Евдокия Анатольевна ойуур кыылларын билиһиннэрдилэр уонна араас хамсаныылаах оонньуулары оонньоттулар. Төрөппүттэригэр фетрынан оҥоһуллубут “Книжка-малютка” араас сайыннарыылаах кинигэлэри оҥортордулар.
Сэтинньи 26 күнүгэр эрдэттэн биллэриллибит төрөппүт аҕалар хаартыскаларынан “Байанай суолунан айан” быыстапка арыллан «Өбүгэ түмэлигэр» көрдөрүүгэ туран оҕолор, төрөппүттэр, үлэһиттэр сэҥээриилэрин ылла.
Ити курдук биһиги уһуйааммыт оҕолоро күнүн ахсын билиигэ, сайдыыга, кыайыыга дьулуһарга иитиллэллэр, саҥаттан-саҥа билиини иҥэринэллэр.
Александра Егорова,
Туйаара Иванова
“Чуораанчык” бөлөх иитээччилэрэ
Улуус хаһыатыгар ахсынньы 2-12 күннэригэр чэпчэтиилээх сурутуу саҕаланна!
