“Үөһээ Бүлүү улууһа” муниципальнай оройуон дьаһалтатын аатыттан уонна тус бэйэм эһигини норуоттар икки ардыларынааҕы дьахталлар күннэринэн истиҥник эҕэрдэлиибин!
Үйэлэр тухары дьахтар туһугар эр дьон хорсун быһыылары оҥороллор, ыарахаттары туорууллар, эйэни туругурдаллар, нус-хас олоҕу түстүүллэр. Дьахтар кэрэтэ, ийэ тулуура, кэргэн таптала, кыыс оҕо нарына, эдьиий-балыс өйөбүлэ – бу иһин эр дьон эһигини таҥара оҥостоллор, таала таптыыллар.
Эһиги минньигэс мичээргит, тэтэркэй имҥит кинилэргэ уһун тыыны, эр санааны, бэйэҕэ эрэли, үтүө санааны, күүһү-күдэҕи күөртүүр.
Ыарахан күҥҥэ-дьылга быа курдук уһаан, тимэх курдук тэнийэн, күн курдук күндээрэн, сарыал курдук сандааран, күүстээхтик сананан, сүрэххит иэйиитинэн, илиигит сылааһынан, өйгүт өркөнүнэн эр дьоҥҥо өй-санаа, күүс-көмө, өйөбүл-тирэх буолаҕыт.
Саха сиригэр тыа сирин дьахталларын 1 сийиэстэрэ тэриллибитэ 100, Үөһээ Бүлүү оройуона тэриллибитэ 90 сылынан, улууспутугар дойдуга бэриниилээх буолуу сылынан олунньу 28 күнүгэр Үөһээ Бүлүү дьахталларын иккис улахан түмсүүлэрэ буолан ааста, кэскиллээх соруктары туруорда.
Дьахтар аймах туруннаҕына, кыайбата-сатаабата суох, туох да үлэттэн толлубат, ханнык да ыарахантан чаҕыйбат. Ыраах анал байыаннай дьайыыга сылдьар уолаттарбытыгар эһиги тикпит таҥаскыт, астаабыт аскыт сэниэ эбэр, санааларын кынаттыыр, эрэл кыымын саҕар, тулууру-дьулууру күүһүрдэр.
Сахаларын сирин аан дойду үрдүнэн аатырда, инники кирбиигэ сылдьар биһиги уолаттарбыт Аҕа дойду Улуу сэриитигэр хорсуннук кыргыспыт аҕа көлүөнэ хорсун быһыытын хатылыыллар. Сотору кэминэн бары кыайыы көтөллөөх дойдуларыгар эргиллиэхтэрэ диэн эрэнэбин.
Күндү киһи аймах кэрэ аҥардара — орто дойду олоҕун бэлэхтээччилэр, күн сиригэр олорор хас биирдии күҥҥүт куккутугар-сүргүтүгэр сырдык эрэ суолу хааллардын! Чэгиэн туругу, көхтөөх олоҕу, ситиһиилээх үлэни, самныбат саргыны, уостубат уйгуну, эрэллээх тапталы баҕарабын! Дьоллоох буолуҥ!
Махталы кытта
Үөһээ Бүлүү улууһун баһылыга Валерий Николаев