Барыгытын Билии күнүнэн уонна саҥа үөрэх дьыла саҕаламмытынан “Үөһээ Бүлүү улууһа” муниципальнай оройуон дьаһалтатын аатыттан уонна тус бэйэм ааппыттан эҕэрдэлиибин!
Балаҕан ыйын 1 күнэ – бу барыбыт үөрүүбүт, эдэр да, эмэн да тэбис-тэҥҥэ оҕолуу долгуйар, туох эрэ ураты дьиктини кэтэһэр күммүт. Оскуола биһиэхэ аан дойду аартыктарын арыйан биэрэр, дьиҥнээх доҕоттору булларар уонна үйэҕэ умнуллубат, барыга бары суолдьут сулус буолар күндү киһини – учууталы кытта көрүһүннэрэр.
Бу күн ордук Билии дойдутугар аан бастаан киирэр кырачааннарга уонна аны саас оскуоланы бүтэрэн, кэтэһиилээх улахан олоххо бэйэлэрэ эрэ аттанааччыларга олус долгутуулаах…
Россия Федерациятын үөрэҕин министиэристибэтин этиитинэн Билии күнэ быйыл балаҕан ыйын 2 күнүгэр бэлиэтэнэр. Үөһээ Бүлүү улууһун 24 оскуолата, 15 оҕо уһуйаана, 6 эбии үөрэхтээһин тэрилтэтэ оҕолору көрсөргө толору бэлэмнэр. Быйылгы үөрэх дьылыгар Билии күнүн чуораанын лыҥкынас тыаһынан 305 кырачаан маҥнайгы кылааска үөрэнэ киириэҕэ.
Оҕолоор, бу күн эһиэхэ хаһан да умнуллубатын, оскуола үөрэҕэ умсугутуулаах буоллун, бу күннэтэ дьаныардаах үлэ, саҥаттан саҥаны, сонунтан сонуну билии-көрүү! Оттон төрөппүттэргэ тулууру, дьулууру, оҕолоргут үгүс ситиһиилэнэн, үөрдэ-көтүтэ сырыттыннар диэн баҕа санаабын тиэрдэбин.
Үөрэх кыһалара эһигини долгуйа кэтэһэллэр, үөрэ көрсүөхтэрэ учууталлар диэн үтүөкэн дьон! Биһиги улууска “Земскэй учуутал” федеральнай бырагыраама куонкуруһун кыайан, Тыва өрөспүүбүлүкэтин үрдүк категориялаах математика, биология, химия учууталлара Боотулууга, Сургуулукка, Туобуйаҕа ситиһиилээхтик үлэлии сылдьаллар, быйыл Далыр оскуолатыгар математика учуутала кэлиэҕэ.
Ытыктабыллаах учууталлар, Эһиги билиигитин, дьоҕургутун, мындыргытын, идэҕитигэр бэриниигитин таба туһанан, өйдөөх, тус соруктаах, дьулуурдаах улууспут инники эрэлин, кэскилин, киһилии киһини, төрөөбүт дойдутун, модун Россия, Саха сирин дьиҥ патриотун иитэн таһаарыаххытын саарбахтаабаппын.
Бука барыгытыгар бөҕө туругу, үлэҕэ-үөрэххэ ситиһиилэри, айымньылаах үлэни, туһалаах дьарыктары баҕарабын!
Саҥа үөрэх дьыла саҥа саҕахтары арыйдын, саҥа үрдэллэргэ дабаттын! Туску!
Истиҥ эҕэрдэни кытта
Үөһээ Бүлүү улууһун баһылыга В.Николаев