Өссө 2020 сыллаахха, ыам ыйын бүтэһигэр Үөһээ Бүлүү улууһун дьаһалтатын планеркатыгар Үөдүгэй нэһилиэгин баһылыга Валерий Васильевич Васильев – Муттуххай Бороҥ Үөдүгэй нэһилиэгин ыччаттарыгар уһаайба биэртэлиэм, ыал буолбакка сылдьар сааһыран эрэр уолаттар элбэхтэр. Кинилэргэ өссө эрдэ уһаайба биэртэлээбит буоллар, дьиэ туттан, ойох ылан, саханы элбэппит буолуо этилэр. Хайдах уһаайбата, дьиэтэ суох, турар бэйэлэринэн сылдьан ойохтонуохтарай? Ити демографияҕа саамай сүрүн боппуруос буолар диэн үрдүк трибунаттан туруорсан дуораппытын дьон хабыллар ытыс тыаһынан доҕуһуоллаабытын күн бэҕэһээ курдук саныыбын. Бэл, омун киһи мин, планерка кэнниттэн Муттуххай Бороҥ массыынатыгар тиийиэр диэри тилэх баттаһан ситэн ылан: « Убаай, мин эмиэ Үөдүгэйгэ төрөөбүтүм, күн бүгүҥҥэ диэри бас билэр сирим суох, мин эмиэ сааһыран эрэбин”, – диэн ыалдьар сирбин таарыттарбыттыы өрө эккирээн ыла-ыла биир кэм этиммитим. Үөдүгэй нэһилиэгин баһылыга Үөдүгэй ыччаттарыгар уһаайба биэртэлиир үһү диэн сурах Саха сирин биир гына социальнай ситимнэринэн тилийэ көппүтэ. Убайбыт Валерий Васильевич- Муттуххай ити кэннэ биир эрэ ый буолаахтаабыта… Кини халлаантан сулус субурус гына сандааран түспүтүнүү бэрт кылгас кэмҥэ Үөдүгэйин да салайдар, хас биирдиибит өйдүү-саныы сылдьарын курдук элбэх, үйэлээх үлэни оҥорон күннэтэ бэйэтин санатар. Онтон чопчу бу Мааркыс ыччаттарыгар уһаайба сирин биэртэлиэхтээх туолбатах ыратын күн бүгүн кини бэйэтэ үүннэрэн таһаарбыт, батыһыннара сылдьан үөрэппит-такайбыт ыччата – Үөдүгэй нэһилиэгин баһылыга Альберт Юрьевич Иванов олоххо киллэрдэ.
Үөдүгэйгэ Молодежнай кыбаарталга Валерий Васильевич Васильев – Муттуххай Бороҥ аатынан уулуссаҕа 13 Үөдүгэй ыччатыгар уһаайба сирин биэртэлээтэ. Ол иһигэр анал байыаннай дьайыыга сылдьыбыт Иван Константинов ылла. Онон бу соторутааҕыта быстах анал байыаннай дьайыылар кыттыылаахтарыгар сир учаастагын биэрии туһунан сокуон биһиги улууска биир бастакынан үлэлээтэ.
Валентина ФИЛИППОВА
