Олунньу 15, 16, 17 күннэригэр Дьокуускай куоракка «Муус устар» ыччат бэстибээлэ буолаары турар. Быйылгы бэстибээл Россияҕа Дьиэ кэргэн, Саха өрөспүүбүлүкэтигэр Оҕо саас сылын чэрчилэринэн ыытыллар. Санатан этэр буоллахха, «Муус устар» СӨ Бырабыыталыстыбатын өйөөһүнүнэн тэриллэр Уһук-Илиҥҥи федеральнай уокурук биир бастыҥ тэрээһининэн буолар.
Манна Үөһээ Бүлүүттэн үгүс ыччат кытта бараары сылдьар. Ол курдук, «Тайны якутских просторов» түһүмэххэ Дүллүкү эдэр ыччата төрөөбүт дойдуларын кэрэ айылҕаларын, сынньанар сирин билиһиннэрэр видео устан финалга киирдилэр.
Салгыы Константин Романятов кэпсиир: — Биһиги 4 буолан сүбэлэһэммит, Николай Васильев -Харыйалаах уола, Николай Седалищев, Никита Иванов уонна мин буоламмыт Дүллүкү кэрэ миэстэлэрин – Саҥа Аппаны уонна сынньалаҥ баазатын Чаайаны устубуппут. Видеооператорбыт – Хоро нэһилиэгин ыччата Айаал Евдокимов квадрокоптерынан айылҕабыт кэрэтин уһулла. Дьокуускайга «Муус устар» бэстибээлгэ тиийэммит олунньу 15 күнүгэр көмүскүөхтээхпит, сарсыныгар түмүк тахсыахтаах. Уопсайа 42 кыттааччы финалга ааспыт, ол иһигэр биһиги. Түгэнинэн туһанан, уолаттар ааттарыттан баһылыкпытыгар Николай Романовка махтанабыт. Кини кыттарга сүбэлээн улахан бэстибээлгэ кыттар чиэскэ тигистибит.
Улууспут эдэр педагогтара «Уһук-Илиҥҥи дьыалабыай оонньууга» хамаанда тэринэн кытта барарга бэлэмнэнэллэр.
Ол курдук, үөрэх управлениетын специалиһа Иннокентий Степанов, М.Т.Егоров аатынан 2-с №-дээх орто оскуола педагог-психолога Вероника Алексеева, «Теремок» оҕо саадын иитээччитэ Лилия Горохова, Сургуулук оскуолатын алын кылаас учуутала Василий Афанасьев уонна Оҕо технопаркатын педагога Олег Волков. Салгыы кыттааччы, үөрэх управлениетын специалиһа Иннокентий Степанов кэпсиир: — Бу дьыалабыай оонньууга өрөспүүбүлүкэ эдэр педагогтарын хамаандаларын кытары күөн көрсөн кыттыахтаахпыт. Миэстэтигэр тиэмэ биэрдэхтэринэ, бырайыак оҥорон көмүскүөхтээхпит.
Биир дойдулаахтарбытыгар ситиһиилэри баҕарыаҕыҥ!
Мария Васильева
