Сыллата ыытыллар аахсыйаҕа экология өттүгэр билиилэрин тургутуон баҕалаах ким баҕар кыттар. Сэтинньи 5 күнүгэр Национальнай бибилэтиэкэҕэ ыытыллыбыт дьыктааны 80-тан тахса киһи суруйда.
«25 боппуруоска 20 мүнүүтэ устата толордулар. Дьыктаан ыытылларыгар көмөлөспүт дьоммутугар махтанабыт. Аан бастакытын маннык хабааннаах былаһаакка тэриллэн үлэлээбитигэр Национальнай бибилэтиэкэ үлэһиттэригэр махтанабыт», – диэн Экология министиэристибэтигэр бэлиэтээтилэр.
Экодьыктаан -2024 сүрүн тиэмэлэригэр Кыһыл кинигэҕэ, экотуризмҥа, ордук харыстанар сирдэргэ сыһыаннаах ыйытыылар киирдилэр. Дьыктаан ыйытыыларын Экодьыктааны бырайыактыыр офис үлэһиттэрэ, РФ Энергетикаҕа министиэристибэтэ, Бүтүн Россиятааҕы «Экология» научнай-чинчийэр институт, учууталлар уонна учуонайдар бары көмөлөөн бэлэмнээтилэр.
Аахсыйа иитинэн араас хабааннаах лекциялар ыытылыннылар. Ону тэҥэ «Меняем крышки и батарейки на конфеты» диэн экологическай аахсыйа саҕаланна. Бу аахсыйа көмөтүнэн пластиктан оҥоһуллубут хаппахтары уонна туттуллан бүппүт батарейкалары ахсынньы 28 күнүгэр диэри хомуйуохтара.
Экологическай дьыктаан түмүгүн ахсынньы 9 күнүн кэннэ бибилэтиэкэ сайтыгар таһаарыахтара. Ону тэҥэ бу дьыктааны куйаар ситимин нөҥүө эмиэ толоруохха сөп. Ол наадатыгар Экодиктант.рус порталга киирэр ирдэнэр. Бу бырайыак Дойду үрдүнэн ыытылларын таһынан тас дойдуларга эмиэ ыытыллыбыта алтыс сыл буолла.
Аан бастакы экодьыктаан 2019 сыллаахха ыытыллыбыт эбит буоллаҕына, 2023 сылга номнуо 182 араас дойдуттан 5 мөлүйүөнтэн тахса киһи кыттыбыта. Мантан көстөрүнэн, экология боппуруоһа хас биирдии киһиэхэ сыһыаннааҕа көстөр. Маннык аахсыйалар көмөлөрүнэн эдэр көлүөнэ дьону айылҕаны харыстыырга, ытыктабыллаах, харыстабыллаах сыһыаны иҥэрии, сиэрдээх буоларга иитэр үлэ барар диэн тэрийээччилэр бэлиэтээтилэр.