Россия суруйааччыта Славяна Бушнева «Новые друзья Снежика, Горика и Егорика» диэн оҕолорго анаммыт кинигэтэ күн сирин көрдө. Манна кэпсэнэринэн, сүрүн дьоруойдар – Горик уонна Егорик диэн уолаттар уонна Снежик диэн хаар киһи Россия бары өрөспүүбүлүкэлэригэр, автономнай уокуруктарыгар, кыраайдарыгар ыалдьыттыыллар. Хас биирдии кэпсээн – дьоруойдар Россия хайа эрэ муннугар көрсөр мүччүргэннээх сырыыларыгар ананар. Саха Республиката бу кинигэҕэ эмиэ баар.
«Истории о Снежике, Горике и Егорике» кинигэлэр серияларынан мультфильмнары устар былаан баар. Манна дьоруойдар РФ араас норуоттарын тылынан саҥарыахтара.
Кэпсээннэрдээх уонна мүччүргэннээх сырыылардаах бэртээхэй серия үс кинигэттэн турар. Бастакыта — «История о Снежике, Горике и Егорике» 2020 с., иккиһэ — «Новые приключения Снежика, Горика и Егорика» 2022 с. тахсыбыттара, онтон үсүһэ — «Новые друзья Снежика, Горика и Егорика» кинигэ хас да чаастан турар. Билигин кинигэ бастакы чааһа таҕыста. Манна сүрүн дьоруойдар Горик, Егорик уонна Снежик «Танцевальная культура народов России» фестивальга кыттыыны ыланнар, араас омуктар оҕолорун кытта доҕордоһоллор. Кинилэр доҕотторун бэйэлэрин дойдуларын кэрэхсэбиллээх муннуктарыгар ыалдьыттата ыҥыраллар уонна араас көрдөөх түгэннэргэ түбэһэллэр.
Бу серия кинигэлэрэ доҕордоһууну, хардарыта көмөлөсүһүүнү, айылҕаҕа тапталы уонна араас омук оҕолорун кытта истиҥ сыһыаны көрдөрөр дьикти, алыптаах кэпсээннэртэн тураллар.
Бэлэмнээтэ Галина Васильева