«Тускул» оҕо айымньытын киинин иһинэн үлэлиир ойуулук оҥоруутунан дьарыктанар «Саҥа Step» куруһуок оҕолоро куйаар ситиминэн Санкт- Петербурга ыытыллыбыт компьютернай анимация күрэҕигэр кытыннылар . Кинилэр «Победа длиною в жизнь» диэн ойуулуктарынан бастакы түһүмэҕи бэрт чэпчэкитик ааспыттара.
Иккис түһүмэххэ тахсан олус үөрэн, күүскэ бэлэмнэнэн уустук анимацияны көрдөрөн, оҕолор сатабыллара арылхайдык көһүннэ. Кырачаан Васильева Юлиана хоһоонун ааҕан бу ойуулугу өссө киэргэппитэ. Уопсай бириэмэтэ 3 мүнүүтэ. 5 оҕо уруһуйдаан, хамсатан дьон — сэргэ сэҥээритин ыллылар. Оҕолор ыйытыктарга бэрт чобуотук эппиэттээбиттэрэ. Ойуулугу хайдах оҥорбуттарын кэпсээтилэр, хас кадр баарын истэн дьүүллүүр сүбэ сөхтө. Оҕолортон хас күн, ханнык бырагырааманан оҥорбуттарын ыйыттылар. Тэрийээччилэр бу ыраах саха сириттэн маннык саҥа технологиялары туһанар, ойуулуктары оҥорор сайдыылаах оҕолор бааллар эбит диэн бэлиэтээн эппиттэрин истэргэ олус үчүгэй.
Оҕолор аныгы технологияны баһылаабыттара билиннэ. Кинилэр хас да сыл дьаныардаахтык үлэлэһэн маннык ситиһиигэ кэллилэр. Оҕолор Арассыыйа таһымыгар бастакы кыттыылара буолар.
Кинилэр улахан махталларын төрөппүт, » Аленушка» оҕо уһуйаанын иитээччитигэр Иванова Надежда Павловнаҕа тириэрдэллэр. Видеоҕа устан, хаартыскаҕа түһэрэн, звуктарын холбоон, арааран биэрэ олорбута, маннык төрөппүт баара үлэҕэ олус көмөлөөх.
Бу Улуу Кыайыы 80 сылын көрсө айыллыбыт «Победа длиною в жизнь» диэн ойуулугу кимнээх оҥордулар? Кононов Эрчим, 8 -с кылаас үөрэнээччитэ, Иванова Алина, 5 -с кылаас үөрэнээччитэ, Прокопьева Амелия, 5-с кылаас үөрэнээччитэ, Николаева Сахайаана, 5-с кылаас үөрэнээччитэ, Михайлова Аина, 5 — с кылаас үөрэнээччитэ, Васильева Юлиана, 1-кы кылаас үөрэнээччитэ- Саҥа «Step» куруһуок оҕолоро. Салайааччылара — саҥаттан саҥа идиэйэнэн тыга сылдьар, талааннаах педагог Анна Павловна Григорьева.