Хас кэрдиис кэм аайы оҕо сайдар сүрүн эйгэтэ уларыйан иһэр. Ол курдук, психологтар бэлиэтииллэринэн, оҕо төрүөҕүттэн биир сааһыгар диэри улахан киһи бодоруһуута, биириттэн үс сааһыгар диэри араас тулалыыр эттиктэр, оонньуурдар, онтон үс сааһыттан сэттэтигэр диэри оонньуу оҕону сайыннарар сүрүн эйгэ буолаллар. Ол иһин оҕо оскуолаҕа киириэр диэри сайдыытыгар оонньуу улахан суолталааҕынан үөрэтэргэ, иитэргэ утумнаахтык туттуллар.
Оҕо олоҕун сүрүн ис хоһооно – оонньуу. Оонньуу оҕо эйгэтэ, айымньыта. Кыра оҕону үксүн оонньуу нөҥүө сайыннарыахтаахпыт. Оонньуу нөҥүө оҕо чэпчэкитик, түргэнник ылынар, үөрэнэр. Өйүгэр-санаатыгар дириҥник иҥэр. Ону таһынан оҕо оонньуу кэмигэр коллективка үөрэнэр, тэҥнээхтэрэ тугу оҥороллорун сыаналыыр, сүбэлиир да буолар. Эйэлээх коллективы олохтуур, оҕолору доҕордуу сыһыаҥҥа иитэр туһугар, көхтөөхтүк оонньотуохха, умсугутуохха наада. Оҕону сайыннарар оонньуулар ханнык баҕарар норуокка көстөллөр, дьоҕурун, өйүн-санаатын эмиэ сайыннарар суолталаахтар. Оҕо оонньуур кэмигэр дьоҕура, толкуйа, болҕомтото, тыла сайдар.
Оннук оонньуунан саахымат буолар. Билиҥҥи ФОП ирдэбилинэн оҕо тэрилтэлэригэр саахымат оонньуу тэнийэн эрэр. «Саахымат» өйү сайыннарар оонньууну оҕо садыгар сатаан тэрийии оҕо инники үөрэниитигэр улахан көмөлөөх. Төрөппүт ону таба өйдөөн, оҕотун иитиитигэр, сайдыытыгар тэҥҥэ кыттыһар, кыһаллар, оҕотун ис санаатын, бастакы ситиһиитин, сороҕор хомолтотун тэҥҥэ үллэстэр. Саахыматынан дьарыктанар оҕо билиитэ-көрүүтэ, интэриэһэ киэҥ, булугас өйдөөх, болҕомтолоох, эппиэтинэстээх, айар, толкуйдуур, саҥарар, ырытар дьоҕурдаах буола улаатар.
«Аленушка» уһуйааныгар «Шашки» куруһуок уруккуттан тиһигин быспакка үтүө түмүктэрдээх үлэлиир. Билигин оҕолор киэҥ-куоҥ, сырдык, туһунан дуобат уонна саахымат хоһугар баран оонньуулларын олус сөбүлүүллэр уонна интэриэһиргииллэр.
Иитээччи бэйэтэ төһө кыалларынан уларытан, киллэрэн-таһааран, эбэн-сабан оҕо интэриэһин, дьоҕурун, кыаҕын учуоттаан үөрэтэрэ, үлэни тэрийэрэ ордук табыгастаах эбит.
Инникитин бу хоспутугар эбии нагляднай пособиелары, литератураны булан өссө айымньылаахтык, таһаарыылаахтык үлэлиэхпит диэн эрэнэбин.
Георгианна Афанасьева,
«Аленушка» оҕо уһуйаанын
педагог-психолога