Ох сааҕа Саха сирин хамаандата Азия оҕолорун оонньууларыгар бэлэм

Норуоттар икки ардыларынааҕы оонньууларга кыттар Саха сирин сүүмэрдэммит хамаандатыгар 14-15 саастаах 6 кыыс уонна 6 уол Алдан, Сунтаар, Кэбээйи, Бүлүү, Горнай, Нерюнгри оройуоннарыттан уонна Дьокуускай куораттан киирдилэр.

«Биһиги оҕолорбут 2023 сыллаахха Россияҕа бастыыр иһин чемпионакка улахан эрэли үөскэтэр ситиһиилэммиттэрэ. Ол курдук,  Кристина Дрозд уонна Айыына Васильева хамаанданан бастыыр иһин күрэххэ кыайыылаах буолбуттара. Спортсменнарбыт бары ситиһиилээхтик кыттан мэтээлгэ тиксиэхтэрэ диэн эрэнэбит. Дьарыктарга биир тэҥ үчүгэй көрдөрүүлээхтэр. Кырата үстүү спортсмен биирдиилээн уонна хамаанданан бастыыр иһин күрэххэ финалга киирэллэригэр эрэл баар», — диэн сүүмэрдэммит хамаанда старшай тренерэ Нюргустан Федотов санаатын эттэ.


Хамаанда Алданнааҕы хайыһар станциятын, Музыка үрдүкү оскуолатын уонна Бэрдьигэстээх сэлиэнньэтин Олимпийскай эрэллэр спортивнай оскуолатын базаларыгар ааста. Билигин оҕолор түмүктүүр дьарыкка сылдьаллар.

«Үгүс сүүмэрдиир күрэхтэһиигэ сылдьан бэйэбитин тургутан көрдүбүт. Сүүмэрдиир түһүмэх этэҥҥэ ааһан, билигин сүүмэрдэммит хамаанда састаабыгар киирэн турабын. Хамаандабыт Оонньууларга ситиһиилээхтик кыттыаҕа диэн эрэнэбин. Күүстээхтик дьарыктаммыт дьон тренердэрбит эрэлэин түһэн биэрбэт курдук кыттыахтаахпыт. Оҕолорго саамай үчүгэй көрдөрүүлэрин ситиһэн бэйэлэрин дьаныардаах үлэлэрин түмүгүттэн астыналларыгар баҕарабын», — диэтэ Нерюнгри куораттытан сылдьар Цыцык Намсараева.

«Сүүмэрдиир түһүмэх миэхэ этэҥҥэ ааспыта. Улахан күрэхтэһиигэ бэлэммин диэххэ сөп, ол эрэн син-биир салгыы үлэлиир наада. Биһиги туспутгар ыалдьар дьон эрэлин түһэн биэрбэт курдук кыттыахпыт диэн эрэнэбит. Сүүмэрдэммит хамаанда хас биирдии кыттааччытыгар олус сэргэх күрэхтэһиини көрдөрөллөрүгэр уонна ситиһиилэнэнллэригэр баҕарабын», — диэтэ Бүлүү улууһун спортсмена Самсон Спиридонов.

Оҕунан ытыы күрэхтэһиитэ Дьокуускай куорат «Юность» стадионугар ааһыаҕа. «Азия оҕолоро» норуоттар икки ардыларынааҕы оонньуулар бэс ыйын 25 күнүттэн от ыйын 7 күнүгэр диэри ыытыллыахтара.

СӨ Бырабыыталыстыбатын уонна Ил Дархан пресс-сулууспатын матырыйаалыттан

Читайте дальше