«Олоххо, үлэҕэ туох суоҕай?» 14 саастарыттан үөһээ саастаах үөрэнээччилэргэ уонна улахан дьоҥҥо улуустааҕы куонкурус ыытылынна.
СӨ культуратын үтүөлээх үлэһитэ, Үөһээ Бүлүү улууһун бочуоттаах олохтооҕо, журналист, фотокорреспондент, “Сэрии тулаайаҕа”, “Олоххо туох суоҕай?” о.д.а. кинигэлэр ааптардара Егор Афанасьевич Афанасьев- Кэпсэтээрэп төрөөбүтэ 90 сылыгар уонна кини кынаттанан тахсыбыт, үлэлээбит, айбыт-туппут улууһун хаһыата төрүттэммитэ 80 сылыгар ананна.
Күрэҕи Егор Афанасьевич Афанасьев оҕолоро уонна улуустааҕы “Үөһээ Бүлүү” хаһыат тэрийдилэр. Күрэх өрөспүүбүлүкэҕэ биллэриллибит Үлэ сылыгар ананна уонна тиэмэтэ бу тула барда: «Олоххо,үлэҕэ туох суоҕай?».
Егор Афанасьевич хос аата да этэринии Кэпсэтээрэп диэн элбэх кэпсээннээх, сытыы тыллаах-өстөөх, дьээбэ- хообо аргыстаах. Кини сылдьарын тухары олоҕор, үлэтигэр буолбут көрүдьүөс түгэннэри кэпсии-ипсии, кэпсиир киһитин ис майгытын, тас дьүһүнүн ойуулуу-ойуулуу, быыһыгар күлэ-үөрэ сэһэргиирин үөлээннэхтэрэ бэркэ диэн өйдүүр, саныыр буолуохтаахтар. Ол иһин күрэхпитигэр олоххо, үлэҕэ, оскуолаҕа буолбут көрүдьүөс түгэннэри, үлэ киһитин, айымньылары литература араас жанрыгар (кэпсээн, очерк хоһоон о.д.а.) суруйдулар.
Күрэх 2023 сыл балаҕан ыйын 22 күнүттэн ахсынньы 10 күнүгэр диэри ыытылынна. Улууспут араас муннугуттан, оннооҕор Мэҥэ Хаҥаластан тиийэ уопсайа 16 үлэ киирдэ.
Түмүгү Егор Афанасьевич оҕолоро үбүлүөйдээх күммүт тэрээһинигэр сыанаҕа туран билиһиннэрдилэр. Туоһу сурук уонна харчынан бириэмийэ Маргарита Борисоваҕа (Мэйик нэһилиэгэ), Валентина Осиповаҕа (Трудовой учаастага), Лариса Николаеваҕа (Өргүөт), М.Т.Егоров аатынан орто оскуола 6 кылааһын үөрэнээччитигэр Самаана Долгуноваҕа (Үөһээ Бүлүү), Мария Васильеваҕа (Оҥхой), Мария Федотоваҕа (Үөһээ Бүлүү), Ороһу орто оскуолатын 8-с кылааһын үөрэнээччитигэр Шура Александроваҕа, Герман Отовка (Дьокуускай к.), Николай Васильевка – Харыйалаах уола (Дүллүкү), саамай ыраахтан үлэтин ыыппыт кыттааччыбытыгар Октябрина Платоноваҕа (Мэҥэ Хаҥалас)
Маны таһынан дьүүллүүр сүбэ быһаарыытынан анал ааттары уонна харчынан бириэмийэлэри туттарардыбыт. Ол курдук «Быара суох ыыппыт кэпсээнньит» анал ааты Ороһу нэһилиэгиттэн Галина Котоконова ылла, «Бастыҥ кэпсээнньит» анал ааты Светлана Егорова (Дүллүкү) тутта, «Саамай эдэр кыттааччы» анал аат Ороһу орто оскуолатын 6 кылааһын үөрэнээччитигэр Илья Терентьевка туттарылынна.
Киирбит үлэлэри сыаналыырга дьүүллүүр сүбэ уһуннук мөккүһэн, толкуйдаан баран кыайыылаахтары быһаарда. Ол курдук,
Үһүс үрдэллээх добун сурук — Мария Даниловна Михайлова, Үөһээ Бүлүү сэлиэнньэтин олохтооҕо. «Быһахта, быһахта!» кэпсээнэ хаһыакка бэчээттэнэн ааҕааччы сэҥээриитин ылбыта. Киниэхэ добун суругу кытта 2 тыһыынча суумалаах харчынан бириэмийэ.
Иккис үрдэллээх добун сурук — Надежда Кардашевская – Куттаах, Үөдүгэй нэһилиэгин олохтооҕо. Надежда кэпсээннэрэ хаһыакка уонна сайтка бэчээттэнэн дьон-сэргэ хайҕабылын ылбыта. Киниэхэ добун суругу кытта 4 тыһыынча суумалаах харчынан бириэмийэ ананна.
Бастакы үрдэллээх добун сурук — Владимир Афанасьевич Федоров, Мэйик нэһилиэгин олохтооҕо. Владимир «Иидик Һуудук» диэн кэпсээнэ хаһыат саҥа нүөмэригэр ааҕаарыҥ! Киниэхэ добун суругу кытта 6 тыһыынча суумалаах харчынан бириэмийэни туттардылар.
Кыайыылаахтары эҕэрдэлиэҕиҥ!
Маны таһынан, «Олоххо үлэҕэ туох суоҕай?» куонкуруһу тэрийбит, улууспут айар куттаах дьонун түмэ тардыбыт бэрт сэргэх күрэҕи ыыппыт Егор Афанасьевич Афанасьев оҕолоругар редакция коллектива Махтал сурук туттарда!
Кыттааччылар кэпсээннэрэ, эрдэ биллэриллибитин курдук, сыл бүтүөр диэри хаһыакка бэчээттэнэ туруохтара.
Мария Васильева
