Бүгүн, муус устар 1 күнүгэр, ССРС, СӨ судаарыстыбаннай бириэмийэтин лауреата, СӨ уонна Арассыыйа үтүөлээх артыыһа, тус олохпор көрсүбүт сүдү киһим, учууталым, Оҥхой нэһилиэгиттэн төрүттээх улуу артыыс Симон Петрович Федотов, биһиги кэккэбитигэр баара буоллар, лоп-курдук 85 сааһын туолуох этэ.
1992 сыллаахха Симон Федотов Саха сиригэр бастакы актерскай студияны арыйбыта, бэйэтэ онно куратордыыра. Арай 1993 сыллаахха, оскуоланы бүтэрбит сылым сайыныгар, Симон Петрович күтүөтүнээн, улууска дерматовенеролог бырааһынан үлэлээбит Василий Егорович Васильевтыын дьиэбэр кэлэн, эксээмэн туппута. Итиэннэ бу актерскай студияҕа быһа иккис кууруска ылан, үөрэтэ илдьибитэ. Куорат курдук дьалхааннаах сиргэ миигин, тыа оҕотун, бэйэтинэн олорор сирбин булан, олохтоон, устудьуон олоҕор үктэннэрбитэ. 1994 сыллаахха мин кэргэммин кытта холбоһон, ыарахан буолан, дойдубар кэлэн хаалбытым. Ол саҕана бу сүүрбэ сылга биирдэ арыллар актерскай студия буолан, академическай уоппуска эҥин бэриллибэт кэмэ этэ. Кэлин Саха сиригэр оннук студия арыллыбытын өйдөөбөппүн даҕаны.
Киинэ артыыһын, Саха Республикатын үтүөлээх артыыһа Анатолий Иванович Васильевтыын Симон Петрович биир дойдулаахтар уонна ыкса табаарыстыылар. Симон Федотов Оҥхойтон, онтон Анатолий Васильев Хороттон төрүттээхтэрэ. Инньэ гынан, бастакы учууталым миигин “нэһилиэстибэ” быһыытынан Анатолий Ивановичка туттарбыта. Ол кэннэ миигин национальнай культура отделыгар көһөрбүттэрэ. Онно баран Анатолий Ивановичка үөрэхпин салҕаабытым. Кэлин режиссер идэтин үөрэнэн бүтэрбитим.
Үүммүт сыл олунньу 1 күнүгэр культура эйгэтигэр үлэлээбитим 25 сылын туолла. Ол тухары бу икки сүдү дьоҥҥо уһуйуллан, такайыллан тахсыбыт киһи быһыытынан, махталым туох да сүрдээх улахан. Кэлин, улахан үлэһит буолан, сааһыран, ыал эбэтэ буолан олорон, кинилэр үтүө ааттарын, киһи быһыытынан үтүөлэрин, айылҕаттан бэриллибит үрдүк дьоҕурдарын улаханнык киэн тутта, сүгүрүйэ саныыбын. Симон Петрович миигин таба тайанан, культура үлэһитин аартыгын арыйан биэрбитэ диэн үйэм тухары саныы, махтана сылдьыам. Ыал да буолбут түгэммэр “бу оҕо салгыы үөрэниэхтээх” диэн суол ортотугар хаалларан кэбиспэтэҕэ, Анатолий Ивановичка туттарбыта.
Симон Петровичка бииргэ үөрэммит оҕолор күн бүгүҥҥэ диэри бары сиэттиспитинэн, бииргэ тутуһан сылдьабыт, биир дьиэ кэргэн бэйэ-бэйэбитин өрүү өйөһө-өйдөһө сылдьабыт. Билигин кинилэр бары биллэр артыыстар. Холобура, Иннокентий Луковцев, Петр Садовников, Ирина Никифорова, Мария Корнилова, Сергей Баланов, Сергей Потапов, Айаал Аммосов.
Убаастыыр, ытыктыыр учууталым бэлиэ күннэригэр, үбүлүөйдээх дааталарыгар санаабатаҕым, долгуйа ахтыбатаҕым диэн суох, киниэхэ аналлаах тэрээһиннэри ыытабын. Быйыл Үөһээ Бүлүүтээҕи норуот театра (режиссер Сайыына Васильева) Симон Федотовка анаан сүрдээх улахан бырайыак оҥорон, “Саха” НКИХ ханаалыгар биэрии бэлэмнээтэ.
Түмүкпэр олохпор көрсүбүт сүдү киһим, учууталым, айылҕаттан айдарыылаах артыыс Симон Петрович Федотов туһунан үтүө өйдөбүлүм сүрэхпэр мэлдьи тыыннаах буолуоҕа диэн бэлиэтээн этиэм этэ. Үөһээ Бүлүүлэр киэн туттар улуу киһибитигэр үөрэммиппиттэн дьоллоохпун, киэн туттабын. Соторутааҕыта культура күнүн чэрчитинэн Дьокуускай куоракка бара сылдьан, «Бастыҥ культурнай-досуговай тэрилтэ» диэн үрдүк наҕарааданы СР культураҕа уонна духуобунай сайдыыга миниистирин бастакы солбуйааччыта Мария Турантаева илиититтэн тутан кэллим. Бу улахан ситиһиим, уопсайынан, үлэм-хамнаһым барыта Симон Петровичка ис сүрэхпиттэн ананар махталым буолуохтун диэн бүгүн, учууталым төрөөбүт күнүгэр, тоһоҕолоон этиэм этэ.
Алена Босикова, СР культуратын туйгуна, Үөһээ Бүлүүтээҕи норуот айымньытын киинин, Олоҥхо дьиэтин директора
