Оҥхой нэһилиэгин С.П. Федотов аатынан сүрүн оскуолатыгар сэтинньи 25 күнүгэр Олоҥхо күнүн чэрчитинэн ыытыллыбыт тэрээһиҥҥэ учууталлар, үөрэнээччилэр, оскуолабыт үлэһиттэрэ Сергей Васильев «Мөҥүрүүр Бөҕө» олоҥхотуттан аахтылар.
Салгыы Олоҥхо күнүн тэрээһинэ сынньалаҥ киинигэр ыытылынна. Манна «Сатабыл» эбээлэр түмсүүлэрэ саха маанылаах аһын — алаадьыны утары буһаран минньигэс сыты таһаардылар. Эбээлэр илиилэрин сылааһа иҥмит алгыстаах алаадьынан ыалдьыттары, оҕолору күндүлээн Олоҥхо тэрээһинин арыйдылар уонна норуот ырыаларын попурри гынан толорон, көрөөччүлэргэ бэлэх ууннулар.
Петр Игнатьев «Кулан Кыырпай бухатыыр» олоҥхотуттан «Сатабыл» түмсүү салайааччыта Наталья Никифорова толордо.
Уһуйааммыт кырачаан иитиллээччилэрэ Юрий Борисов «Баһырҕастаах Баабый Баатыр» олоҥхотун ааҕан чуопчааран көрөөччүлэр сэҥээриилэрин ылыллар.
«Кэскиллэр» театр-студия оҕолоро Прокопий Ядрихинскай «Дьырыбына Дьырылыатта кыыс бухатыыр » олоҥхотуттан аахтылар. Онтон Николаевтар дьиэ кэргэттэрэ иккис чааһын салҕыытын ааҕан толордулар.
Өбүгэ саҕаттан оонньонор хабылык, хаамыска оонньууларыгар араас таһымнаах күрэхтэр хас да төгүллээх кыайыылаахтара, призердара, ветеран спортсменнарбыт Марина Игнатьева, Николай Васильев бириистэригэр оскуола үөрэнээччилэригэр хабылык, хаамыска күрэҕин Лариса Евдокимова ыытта.
Түмүккэ олоҥхо тэрээһинигэр көхтөөхтүк кыттыбыт дьоҥҥо, үөрэнээччилэргэ оскуола коллективын аатыттан махтал, туоһу суруктар туттарылыннылар, олоҥхо ааҕыытын кыайыылаахтарыгар сынньалаҥ киинин директора Мария Барахова сэмэй бэлэх туттартаата. Олоҥхо дьоруойдарын уруһуйун күрэҕин кыайыылаахтарыгар добун суругу Надежда Ноговицына туттарда.
Бу курдук Оҥхойбут нэһилиэгэр Олоҥхо күнэ киэҥ ис хоһоонноохтук тэриллэн, олохтоохторго улахан сэргэхсийиини таһаарда, иитэр-үөрэтэр суолталанна.
Мария Васильева, Оҥхой нэһилиэгин С. П. Федотов аатынан сүрүн оскуола эбии үөрэхтээһиҥҥэ педагога
«Үөһээ Бүлүү» хаһыат