Быйыл, Ороһу нэһилиэгэ МТ “1000 дворов” Уһук Илиҥҥи регион Федеральнай программатыгар ситиһиилээхтик киирсэн, Кыайыы болуоссата уонна оҕо оонньуур былаһаакката хаттаан өрүмүөннэннэ, саҥа оборудованиенан хааччылынна.
Былырыын, П.Н. Тобуроков төрөөбүтэ 105 сылын көрсө Ороһу орто оскуолатын коллектива Республикатааҕы уустар күрэхтэрин иилээн-саҕалаан ыыппытта. Ол түмүгүнэн, Кыайыы болуоссатын ыкса турар “Выпускниктар сквердэрин”, народнай поэт айымньытын дьоруойдара киэргэппиттэрэ.
Ороһу орто оскуолатын ситиһиилээх, дьон-сэргэ болҕомтотун ылбыт бырайыага быйыл өссө киэркэйэн, тупсан “Саха народнай поэта, сэрии бэтэрээнэ П.Н. Тобуруокап аатынан мини-парк” аатын сүктэ.
Бырайыак ымпыгын-чымпыгын ООО “Мегаполис-19” тэрилтэ чочуйан оҥордо. Олоххо киириэхтээх бырайыак кэккэ ирдэбиллэрдээх эбит, ол курдук элбэх кыбартыыралаах дьиэ таһыгар турара уонна доруобуйатынан хаарчахтаах оҕолорго аналлаах оборудованиелаах буолар диэн. Субу манна олохтоох дьаһалта баһылыгын солбуйааччы Анастасия Капитоновна Ильина уонна Ороһу орто оскуолатын нуучча тылын уонна литературатын учуутала, кыраайы үөрэтээччи Сардаана Николаевна Васильева күүскэ ылсан үлэлэстилэр.
Бу сайыны мэлдьи үгүс үлэ баран, алтынньы 15 күнүгэр мини-парка үөрүүлээх быһыыга-майгыга оҕо-аймахха аанын нэлэччи арыйда.
Мини-парка хас да зонаттан турар: анал асфальт тэлгэтиилээх роликтыыр, сүүрэр дорожка, кыра уонна орто саастаах оҕолорго аналлаах оонньуур инвентарь уонна доруобуйаларынан хаарчахтаах оҕолорго сөптөөх тренажердар.
“Күнү быһа биһиги
Кими кытта оонньуубут?
Күнү быһа биһиги
Күнү кытта оонньуубут!”
Петр Тобуруокап
Күммүт-дьылбыт даҕаны оҕо-аймах үөрдүн-көттүн диэбиттии чаҕылыччы туран биэрдэ. Петр Тобуруокап оҕо-аймахха анаан үгүс айымньытын суруйан хаалларбыт кыратыттан кырдьаҕаһыгар тиийэ ытыктыыр поэппыт буолар. Онон кини сырдык аата кэлэр кэнччэри ыччаппытын араҥыччылыы туруо диэн саарбахтаабаппыт.
Уйбаан Ороһуунускай аатынан
Ороһутааҕы библиотека
сэбиэдиссэйэ Жанна Иванова