Үөһээ Бүлүүтээҕи Оҕо технопаркатын педагога Гоголев Николай Никонович үс түһүмэҕи ааһан республикаҕа ыытыллыбыт “Сүрэхпин оҕолорго аныыбын” күрэххэ 1 үрдэллээх ЛАУРЕАТ аатын ылла!
Бастакы түһүмэх улуус иһигэр эбии үөрэхтээһин уһуйааччыларын икки ардыгар ыытыллыбыта. Онно ДЮСШ, ДШИ, Оҕо технопаркатыттан уонна Бараахап аатынан орто оскуолаттан эдэр талааннаах педагогтар эрбии биитинии эрийсибиттэрэ. Түмүккэ кылаан чыпчаал аатын Николай Никонович сүкпүтэ. Эдэр педагогтар бары салгыы республика таһымыгар кыттарга быраап ылбыттара. Ону ааһарга “Видеовизитка” көрүүтэ быһаарар оруоллааҕа. Республиканскай хамыыһыйа Николай видеовизиткатын үрдүктүк сыаналаан, салгыы кыттарыгар кыах биэрбиттэрэ.
Онтон, дьэ, сүрүн түһүмэх – Дьокуускай куорат 13-с нүөмэрдээх орто оскуолатыгар олох билбэт оҕолоругар киирэн дьарык ыытааһына. Сорох оҕолор бэрээдэгэ суох буолан биэрбиттэр. Били өс хоһоонугар “Үчүгэй куһаҕана суох буолбат” дииллэринии, хата, ол оҕолору уолбут түргэн үлүгэрдик робот оҥоруутунан интэриэһиргэтэ охсон, мэниктиэх курдук буолбут оҕолор тута уоскуйан, тэҥҥэ үлэлэһэн, уруок бүтүүтэ эйэҕэстик бакаалаһа хаалбыттар. Ону көрөн олорбут дьүүллүүр сүбэ сөптөөх сыанабылы биэрэн, Николай Никонович тэҥҥэ киирсэ сылдьар сэттэ киһититтэн, аҥаардас кинини финалга аһарбыттар. Онон лауреат үрдүк аатын чиэстээхтик сүкпүтүнэн, Оҕо технопаркатын эдэр, эрчимнээх, элбэҕи эрэннэрэр педагогун Николай Никоновиһы эҕэрдэлиибит! Эрэлбитин түһэн биэрбэккэ, инникитин да туох баар сатабылын, билиитин биэрэн туран ситиһиилээхтик үлэлииригэр баҕарабыт.
Антонина Хобусарова
