«Почта Банк» иһитиннэрбитинэн, балаҕан ыйын саҕаланыытыгар Саха сирин олохтоохторо 63 тыһыынча каартаны оҥотторбуттар. Сыл саҕаланыытыгар 49 тыһыынча каарта эбит буоллаҕына, билигин номнуо 22 % эбиллибит.
Балаҕан ыйыттан театр сезона арылынна. Театр айар кэлэктииптэрэ саҥа репертуардарынан кэнсиэртэри, гастроллары саҕалаатылар. Ол курдук, репертуардарыгар оскуола бырагырааматыгар киирбит айымньылары киллэрэн биэрдилэр. Ону тэҥэ саҥа үөрэх дьылыттан түмэллэр Пушкинскай каартанан үлэлэрин саҕалаатылар. Национальнай бибилэтиэкэ үөрэх тэрилтэлэринэн сылдьан ааҕааччы билиэттэрин, устудьуоннарга Пушкинскай каарталары оҥорон биэрэр өҥөтүн сөргүттэ. Бырагыраамаҕа өрөспүүбүлүкэ үрдүнэн 16 галерея уонна түмэл, 13 театр, 3 кэнсиэртиир былаһаакка, 93 култуура сынньалаҥ кииннэрэ уонна дыбарыастара, 5 бибилэтиэкэ, 8 үөрэх тэрилтэтэ, 9 киинэ тыйаатыра киирэн олороллор.
«Пушкинскай каарта» бырагыраамата дойду Президенэ Владимир Путин көҕүлээһининэн ыччаты култуура уонна искусство уус-уран айымньыларын үөрэтэллэригэр, төрөөбүт дойдуттан саҕалаан бүтүн аан дойду таһымыгар тэҥнээх сыаннастары иҥэринэллэригэр, култуураларын таһымын үрдэтэр сыаллаах 2021 сыл балаҕан ыйын 1 күнүттэн олоххо киирбитэ.
СӨ Ил Дарханын уонна Бырабыыталыстыбатын пресс-сулууспатын матырыйаалыттан