Бу сыл бэс ыйыгар Саха сиригэр 911 оҕо күн сирин көрдө: 474 уол уонна 437 кыыс. Бу оҕолор бары Ил Дархан көҕүлээһининэн олохтоммут “Үйэ оҕолоро” тус сыаллаах хапытаалга тиксиэхтэрэ.
Саха сирин үлэҕэ уонна социальнай сайдыыга министиэристибэтин иһитиннэриитинэн, “Үйэ оҕолоро” тус сыаллаах хапытаалы Дьиэ кэргэн сылынан биллэриллибит сыл алта ыйын устата, ону тэҥэ өрөспүүбүлүкэҕэ Оҕо саас сылыгар 5018 ыал ылан туһанна.
Өрөспүүбүлүкэ сүүс сааһыгар олохтоммут бу маннык өйөбүл кээмэйэ, Ил Дархан Айсен Николаев быһаарыытынан, өссө биэс сыл устата, 2027 cылга диэри оҥоһуллар буолла. Хапытаалы 2022 сыл тохсунньу 1 күнүттэн 2027 сыл ахсынньы 31 күнүгэр диэри төрүөх эбэтэр ииттэ ылыллыбыт оҕолорго барыларыгар бэриллэр. Көмөнү туһанарга оҕо төрөөбүт бэрээдэгэ уонна ыал дохуотун таһыма оруолу оонньообот.
Бу сылга тус сыаллаах хапытаал ииндэксэтин кээмэйин кытта холбоон 110 тыһыынчаттан тахса солкуобайдаах буолла.
Тус сыаллаах хапытаал өҥөтүн туһанарга 16 689 көҥүлү бу сыл от ыйын 3 күнүгэр диэри быһаарыы быһыытынан ыллылар. Олор истэриттэн 11 191 сайабылыанньалаах өҥөнү туһанар буолла. Ордук киэҥник хапытаалы туттуу хайысхаларынан хаалаллар: олорор дьиэ услуобуйатын тупсарыы (8 410 сайабылыанньа уопсайа 841 мөл. солк. суумалаах киирбит) уонна тимир көлөнү атыылаһыы (2 503 сайабылыанньа 250,3 мөл. солк. суумаҕа киирбит).
71 дьиэ кэргэн “Үйэ оҕолоро” тус сыаллаах хапытаал үбүн бааннарга оҕо аатынан уурунуу арыйан уктулар, 69 дьиэ кэргэн – оҕо инники үөрэҕириитигэр, 61 дьиэ кэргэн – бэйэ кэтэх хаһаайыстыбатын сайыннарыыга, ону тэҥэ тыа хаһаайыстыбатыгар аналлаах тиэхиньикэни ылыныыга анаатылар, 42 дьиэ кэргэн оҕоҕо үрдүк технологиялаах медицинскэй көмөнү оҥорууга уонна санаторий-курорт көмөтүнэн эмтэнии өҥөтүн туһаныыга, 27 дьиэ кэргэн – дьиэ кэргэнинэн дойду иһигэр сынньана барарга, 7 дьиэ кэргэн – олорор дьиэни гааһынан хааччыйыыга уонна биир дьиэ кэргэн оҕо олоҕун уонна доруобуйатын страховкалаатылар.
Ил Дархан Айсен Николаев сорудаҕынан, “Үйэ оҕолоро” тус сыаллаах хапытаалы оҥотторон ылыы муҥутаан судургутуйбут, оттон үбү туһаныы хабаана кэҥээбит. Тус сыаллаах хапытаал оҕо төрөөбүтүн туһунан туоһу
докумуоннарга олоҕуран, сайабылыанньата уонна социальнай көмүскэл уорганнарыгар сылдьыыта суох тута ананар. Төрөппүттэр иккиэн Арассыыйа гражданиннара буолуохтаахтар уонна олорор сирдэрэ Саха сирин иһинэн суруллубут буолуохтаах, ону тэҥэ оҕо төрөөбүтүн туһунан туоһу суругу ылаллара ирдэнэр.
СӨ Бырабыыталыстыбатын уонна Ил Дархан пресс-сулууспатын матырыйаалыттан
