Биир кэсээмэн бастакы түмүктэрэр билиннилэр. Ол курдук, Саха сирин 12 оскуоланы бүтэрээччи оҕо 100 баалга суруйда. Географияны — 1, химияны — 2, литератураны — 9 оҕо.
Санатар буоллахха, Ил Дархан Айсен Николаев 2022 сыллаахха эксээмэни 100 баалга толорбут оҕоҕо 100 тыһыынча солкуобай суумалаах бириэмийэни олохтообута.
«Оҕолору, учууталлары уонна төрөппүттэри ис сүрэхпиттэн эҕэрдэлиибин! Саха сирэ эһигинэн киэн туттар», — диэн Айсен Николаев телеграм-ханаалыгар суруйбут.
2 №-дээх Нам орто оскуолатын үөрэнээччитэ Юрий Марков уонна 2 №-дээх Нерюнгри куоратын гимназиятын бүтэрэн эрэр Артур Кувандыков химияҕа эксээмэни 100 баалга толордулар. 19 выпускник 90-тан тахса баалга, оттон 3 выпускник – 99 баалга суруйбут.
Дьокуускай куорат лицейыттан Сергей Куркутов география эксээмэнин 100 баалга туттарда. бу предмеккэ 100 баалга 2020 сыллаахха эрэ туттарбыттара. Манна 4 оҕо 90 тахса баалга толорбут.
Литератураны муҥутуур баалга Бүлүү улууһун Хампа орто оскуолатын үөрэнээччитэ Айталыына Гоголева, Мэҥэ-Хаҥалас улууһун Хаптаҕай орто оскуолатыттан Арина Терентьева уонна Майатааҕы лицейтэн Нюргуяна Макарова, Мииринэй куорат 19 №-дээх орто оскуолаттан Самира Фахретдинова, Нерюнгри куорат 2 №-дээх орто оскуолатыттан Ксения Луценко, ону тэҥэ куорат классическай гимназиятын үөрэнээччитэ Сергей Зарубин, 29 №-дээх оскуолаттан Элеонора Горнакова, 33 №-дээх оскуолаттан Анастасия Жирякова, өрөспүүбүлүкэтээҕи лицейтэн Михаил Лукачевский толордулар. Бу предмеккэ 19 выпускник 90-тан тахса баалы ылбыттар. Үөрэх министиэристибэтин иһинэн үлэлиир кэтээн, тэҥнээн көрөр киин үлэһиттэрэ иһитиннэрбиттэринэн, бу ыйыллыбыт предметтэргэ орто баал ааспыт сыллааҕыны кытта тэҥнээтэххэ, үрдээбит. Химия уонна география предметтэригэр алын баалы ылбакка эксээмэни туттарбатах оҕо ахсаана аҕыйаабыт. Санатар буоллахха, 2023 сылга литератураҕа 100 баалы 8 выпускник ылан турар, оттон химияҕа 3 эрэ этэ.
СӨ Бырабыыталыстыбатын уонна Ил Дархан пресс-сулууспатын матырыйаалыттан
