Россияҕа Дьиэ кэргэн, Саха сиригэр Оҕо саас сылыгар өрөспүүбүлүкэбитигэр икки элбэх хайысхалаах дьиэ кэргэн киинэ үлэлээтэ. Бу кииннэр арыллыахтарын туһунан Ил Дархан Айсен Николаев ааспыт сыллааҕы туһаайыытыгар иһитиннэрбитэ. Айсен Сергеевич ол этиитигэр дьиэ кэргэн оҥкула суох олоҕун тупсарарга туһуламмыт сэрэтэр үлэлэр социальнай эйгэҕэ сүрүн хайысханан буолалларын бэлиэтээбитэ.
«Өрөспүүбүлүкэҕэ элбэх хайысхалаах дьиэ кэргэн кииннэрэ тэриллэннэр, «биир түннүк» ньыматынан үлэлээн, дьиэдьиэ кэргэттэр кыһалҕаларын быһаарарга төһүү күүс буолуохтаахтар. Быйыл Нам улууһугар маннык киин үлэлээтэ, кэлэр сылга Чурапчыга уонна уонна Дьокуускай куоракка арыллыаҕа», – диэн Айсен Николаев эппитэ.
Чурапчы улууһугар элбэх хайысхалаах дьиэ кэргэн киинэ тохсунньу 30 күнүгэр, оттон Дьокуускай куоракка ыам ыйын 31 күнүгэр аһыллыбыттара. Аны Уус-Алдан улууһугар маннык киин бу сыл бүтүөр диэри үлэҕэ киириэхтээх.
Чурапчы улууһугар тутуллубут кииҥҥэ дьоҥҥо туһуламмыт иһитиннэриилэри ыларга, уочараты кэтэһэргэ, оҕолору аралдьытарга табыгастаах хостордоох, итиэннэ куйаар ситимин көмөтүнэн цифровой өҥө оҥоһуллар анал сирдээх. Бастакы сырыыттан сылдьан туһааннаах боппуруоска хоруй ыларга туһуламмыт үлэ «биир түннүк» ньыматынан ыытыллар. Манна специалистар дьиэ кэргэттэр кыһалҕаларын тута быһаарарга үлэлэһэллэр. Ону тэҥэ суһал көмөнү оҥорорго анаммыт психолог, социальнай өҥөлөрүнэн хааччыйар уонна социальнай өттүнэн сирдээн биэрэр салаалар тэҥинэн үлэлииллэр.
Оттон Дьокуускай куоракка баар элбэх хайысхалаах кииҥҥэ дьахталларга социальнай реабилитация тэрээһиннэрин ыытарга табыгастаах кабинет, оҕолоноору сылдьар кэрэ аҥардарга дьарыктанар саала, ийэ уонна оҕо хоһо уонна оҕолордоох ийэ, хат дьахталлар уонна доруобуйаларынан хааччахтаах оҕолору быстах кэмҥэ олордорго табыгастаах хостор бааллар. Маны таһынан «Перспектива» диэн ыччат кулууба, «Аҕам уонна мин» диэн оҕолорун аҥардастыы иитэ сылдьар аҕаларга өйөбүл үлэни тэрийэргэ анаммыт хостордоох.
Өрөспүүбүлүкэҕэ тэриллибит элбэх хайысхалаах дьиэ кэргэн кииннэрэ Россия Үлэ министиэристибэтин федеральнай пилотнай бырайыагын чэрчитинэн тэрилиннилэр. Бу бырайыакка Россия 30-ча регионуттан Саха сирэ биир бастакынан киирсэн, үлэни тэрийэн саҕалаата.
Ил Дархан уонна Бырабыыталыстыба пресс-сулууспатын матырыйаалыттан