Байыаннай дьайыы кыттыылаахтарын дьиэ кэргэттэрин 371 чилиэнэ, ол иһигэр 222 оҕо доруобуйаларынан хаарчахтаах оҕолору реабилитациялыыр өрөспүүбүлүкэтээҕи кииҥҥэ чөлгө түһэриини ааста. Бу туһунан дириэктэр киинэ Зинадида Максимова иһитиннэрдэ.
Бу кииҥҥэ көмөҕө наадыйар дьон чөлүгэр түһэриллэригэр туһуламмыт усулуобуйа барыта олохтонон, материальнай хааччылыыта аныгы ирдэбилгэ эппиэттиир гына толору оҥоһуллан турар. Хонуктаан сытан эмтэниини ааһар стационар үлэлиир, манна улуустан кэлбит оҕолор уонна кинилэр төрөппүттэрэ түһэллэр. Оҕолору күҥҥэ биэстэ, улахан дьону үстэ аһаталлар.
«Оҕолор бу кииҥҥэ доруобуйаларын туругун бэрэбиэркэлэнэллэр, ол кэннэ хас биирдии оҕо туругун көрөн анал бырагырааманан эти-сиини, уйулҕаны чэбдигирдэр бырагыраама оҥоһуллар. Улахан болҕомто төрөппүттэр уйулҕаларыгар ууруллар. Ол курдук, социальнай-педагогическай, медицинскэй уонна тулалыыр эйгэҕэ сыһыаны бөҕөргөтөр үлэ ыытыллар.», – диэн Зинаида Максимова кэпсээтэ.
Кини этэринэн, сэтинньи 27 күнүгэр доруобуйаларынан хаарчахтаах дьон декадаларыгар анаммыт тэрээһиннэр чэрчилэринэн Саха сирин циркатыгар «Твори добро!» сыллата ыытыллар аахсыйа буолан ааста. Социальнай реабилитацияны ааһар байыаннай дьайыы кыттыылаахтарын дьиэ кэргэттэрэ араас маастардар кылаастарыгар, социальнай көмүскэл уонна Социальнай пуонда управлениетын үлэһиттэриттэн сүбэ-ама ыллылар. Ону тэҥэ бу киин көмөтүнэн «Материнская слава» түмэлгэ экскурсиялар тэриллибиттэрэ, «Россия ийэлэрэ» Бүтүн Россиятааҕы уопсастыбаннай хамсааһын салайааччытын Прасковья Борисованы кытта көрсүһүүгэ кыттыыны ылбыттара.