2024-2025 үөрэх дьылыгар үрдүк үөрэх кыһаларыгар 5511 бюджеттэн көрүллэри миэстэ олохтоммут. Ол курдук, М.К.Аммосов аатынан ХИФУ — 4136 миэстэ, ол иһигэр үрдүк үөрэххэ – 3861 миэстэ, орто анал үөрэххэ – 275 миэстэ, ол иһигэр целевой миэстэ – 657. Ону тэҥэ Арктикатааҕы судаарыстыбаннай агротехнологическай университекка — 767 бюджет миэстэтэ, Арктикатааҕы судаарыстыбаннай култуура уонна искусство институтугар — 140, Чурапчытааҕы судаарыстыбаннай физическэй култуура уонна спорт институтугар — 145, Дьокуускайдааҕы уу транспорын институтугар — 284, Музыка үрдүк оскуолатыгар – 39 миэстэ.
Ону тэҥэ бу сылга анал байыаннай дьайыы кыттыылаахтарыгар уонна кинилэр оҕолоругар хас биирдии хайысхаҕа бюджет уопсай миэстэтиттэн 10% көрүллэр. Бу анал квота бакалавриат уонна специалитет бырагыраамаларыгар эрэ сыһыаннаах. Маннык көрүллүбүт миэстэ туһунан үрдүк үөрэх кыһаларын сайтарыгар киирэн көрүөххүтүн сөп. Ураты квота миэстэтигэр анал байыаннай дьайыы кыттыылаахтара, кинилэр оҕолоро, РФ дьоруойдара, «Хорсунун иһин» үс уордьаннаах дьон киирсиэхтэрин сөп. Үрдүк үөрэххэ туттарсааччы бу квотанан туһанарын туһунан ыспыраапка көрдөрүөхтээх. Бу туһунан иһитиннэрии үөрэхтэр сайтарыгар эмиэ ыйыллар.
2024 сылга үрдүк үөрэххэ туттарсарга 5 үөрэх кыһатыгар тэҥинэн докумуону биэриэххэ сөп. Ол иһигэр биир үөрэх тэрилтэтигэр хас да хайысхаҕа. Хас хайысхаҕа биэриэххэ сөбүн үрдүк үөрэх кыһата бэйэтэ быһаарар, ол эрэн 5-тэн элбэҕэ суох. Докумуоннары Госуслуга порталыгар «Поступление в вуз онлайн» суперсервис нөҥүө бэриллэр. Докумуоннар Федеральнай реестр даннайынан бигэргэммит буолуохтаахтар.
Холобур, пааспар дааннайдара Ис дьыала министиэристибэтин бэрэбиэркэтин ааспыт буоллаҕына, атын сиргэ ханна да бигэргэтэр наадата суох. Үрдүк үөрэх онлайн-сервиһин нөҥүө бэрэбитэркэни ааһыахха эмиэ сөп. Ол эрэн хас биирдии үөрэх кыһатыгар баар буолбат, докумуону Россия Почтатын нөҥүө ыытыах иннинэ үөрэх кыһатыттан чуолкайдыыр тоҕоостоох. Докумуоннар оригиналларын эбэтэр куопуйаларын сакаастаммыт суругунан тус бэйэҕит ыытаргыт ордук эрэбиллээх. Ону тэҥэ бэйэҕит докумуоннары тутар хамыыһыйаҕа тиксэриэххитин сөп. Докумуоннары тутуу саҕаланнаҕына сайабылыанньаны Госуслуга нөҥүө ыытыаххытын сөп.
Бюджет миэстэтигэр күнүскү үөрэххэ докумуоннары тутуу бэс ыйын 20 күнүттэн саҕаланыаҕа. От ыйын 25 күнүгэр докумуоннары тутан бүтүөхтэрэ. Оттоон целевой миэстэҕэ докумуону биэрии 2024 сылтан уларыйыы киирдэ. ол курдук, целевой миэстэҕэ биир эрэ үрдүк үөрэҕи аталан бэриллэр буолла. Итиэннэ биир эрэ хайысханы чопчу ыйыллыахтаах. Целевой үөрэххэ ыытар сакаас оҥорооччу, ол эбэтэр инники өттүгэр үөрэх кэннэ үлэҕэ ылар тэрилтэ, «Работа в России» платформаҕа целевой миэстэҕэ дуогабар түһэрсии саҕаламмытын туһунан биллэрии таһаарарар ирдэнэр. Абитуриент сакааһы оҥорооччулар биллэриилэрин көрөн бэйэтэ билсиэхтээх уонна сайабылыанньатын кумааҕынан тиксэриэн эбэтэр куйаар ситимин нөҥүө ыытыан сөп. куйаар ситимин нөҥүө ыытар буоллаҕына, Госуслуга портал нөҥүө толоруллар. Целевой миэстэнэн үөрэххэ киирбит абитуриент үлэҕэ ылбыт тэрилтэтигэр кырата үс сыл үлэлиэхтээх, ол эрэн 5 сылтан уһуо суохтаах. 5 сыл кэннэ үлэһит салгыы үлэлиирин-суоҕун бэйэтэ быһаарар.
СӨ Бырабыыталыстыбатын уонна Ил Дархан пресс-сулууспатын матырыйаалыттан
