Бу күннэргэ куйаар ситимигэр Оятилло диэн сахалыы саҥарар омук уола дьон биһирэбилин ылла. Кинини үлэлии сырыттаҕына блогер, «Say saqa» бырайыак төрүттээччитэ – Уйгулаана Николаева сэҥээрэ көрөн, видеоҕа устан таһаарбыт.
«Нөрүөн-Нөргүй! Мин аатым Оятилло диэн. Табаарыстарым бары сахалар. Түүр омук тыллара уонна саха тыла майгыннаһаллар, онон үөрэтэргэ чэпчэки. Саха тылын кыратык өйдүүр буоламмын, сахалыы кэмиэдьийэ киинэтигэр оонньуур баҕа санаалаахпын. Төрүкү кэмиэдьийэҕэ эрэ уһулларга баҕарабын, тоҕо диэн мин уол оҕото моҕотой буоллаҕым. Кыргыттар уонна уолаттар бэйэҕит төрөөбүт тылгытын уонна култуураҕытын умнумаҥ. Ханнык эмэ атын омук тылын үөрэтэр санаалаах буоллаххытына, бастатан туран бэйэҕит төрөөбүт тылгытын үөрэтэргэ дьулуһуҥ. Саха тылын үөрэт!», — диэн Оятилло Тешебаев баҕа санаатын тиэртэ.
Видео*: saysaqa бөлөхтөн.
«Үөһээ Бүлүү» хаһыат.