Дракон сылын көрсүү үөрүүлээх бырааһынньыга бу күннэргэ улуус бары оскуолаларыгар ньиргийдэ. Ол курдук, Ю.Н.Прокопьев аатынан спортивнай орто оскуолаҕа ахсынньы 27-28 күннэригэр Саҥа дьыллааҕы утренниктар үрдүк тэрээһиннээхтик буолан аастылар. Бастакы күн алын сүһүөх кылаастарга аатырбыт “Аленький цветочек” улуу нуучча остуоруйатын оскуола иитэр үлэҕэ завуһа Сардаана Романовна Габышева туруорда. Манна оскуола үлэһиттэрэ уонна сүрүн оруолларга үрдүкү кылаас үөрэнээччилэрэ оонньоон кыра кылаас оҕолорун уонна төрөппүттэрин аптаах остуоруйа дойдутугар ыалдьыттаттылар. Декорацияҕа алаҕаркаан – тэтэгэркээн сибэккичээн үүммүт күөх хонуута, муоранан устар хараабыл, нуучча остуоруйатын оһоҕо бэлэмнэммитэ, остуоруйа дьоруойдарын көстүүмнэрэ, артыыстардыы туттан – хаптан оонньууллара барыта дьиҥнээх курдук. Биир интэриэһинэйэ баар, аны остуоруйа дьоруойдара сценарий быһыытынан эрдэ, Үөдүгэй кулуубун кэпсэтэн аудиозаписька бэйэлэрин оруолларын саҥатын устубуттар эбит, ол иһин киинэ көрө олорор курдуккун, итэҕэтиилээх баҕайы буолар эбит!
Сардаана Романовна уопуттаах сценарист, туруорааччы режиссер быһыытынан Саҥа дьыллааҕы утренниктар сценарийдарын бэйэтэ суруйан, хас биирдии кылааска остуоруйа талларан, учууталлар төрөппүттэрин кытары бэлэмнээбит остуоруйаларын саалаҕа мустубут оҕолорго уонна төрөппүттэргэ көрдөрдүлэр. Ол курдук, бастакы кылаастартан саҕалаан бииртэн биир кэрэ остуоруйалары көрдүбүт: «Царевна несмеяна» 1 “а” кылаас, (кылаас салайааччыта Каратаева Э.Н.), “Остуоруйалар сарыабыналара” — 1 “б” кылаас (Степанова С.А.), “Өлбүт сарыабынаны” 2“а” кылаас ( Еттянова М.В.) “Буратино мүччүргэннээх сырыыларын ”2 “б”кылаас – сал. Андреева С.Г., “Дьиэ дьиэчээн” – 3 “а” кылаас (Николаева В.П.), 3 “б” кылаас “Дюймовочка” (Муксунова О.И.), “Щелкунчик” – 4 “а” кылаас (Гаврильева И.А.) “Уон икки ый” остуоруйаны 4 “б”( Попова М.Я.), бэлэмнээн олус бэркэ туруордулар. Салгыы үгэскэ кубулуйбут Драконнар күрэхтэрэ, бастыҥ мааскалары талыы, Эһээ Дьыл Хаарчааналыын бастыҥ ситиһиилээх үөрэнээччилэргэ эҕэрдэлэрэ, бэлэхтэрин хас биирдии оҕоҕо туттарыылара – бу буолар күүтүүлээх бырааһынньык үөрүүлээх уонна долгутуулаах түгэннэрэ!
Иккис күн улахан кылаас үөрэнээччилэригэр аналлаах тэрээһин отой атын сценарийдаах ыытылынна. Туруорааччы – режиссер салайыытынан 5 — 11 кылаастарга киинэ устуутугар эрдэ сорудах бэриллибит уонна бырааһынньык күн саалаҕа мустубут дьоҥҥо көрдөрүү, ол түмүгүнэн “Оскар” номинацияларын туттарыы буолла.
Кылаас салайааччылара аны бэйэлэрэ режиссер оруолугар киирэн, Саҥа дьыллааҕы бырааһынньыкка сыһыаннаах, көрдөөх – нардаах киинэлэри устан көрөөччүлэр дохсун ытыс тыастарынан түмүктэннилэр.
Бырааһынньык саамай долгутуулаах түгэнинэн буолла – 2023 сыл түмүгүнэн спортивнай орто оскуола 10 чулуу спорсменнарын чиэстээһин.
Кириллина Чөмчүүнэ – 3 «б», Саввинов Платон – 6 «а», Архипов Элан – 7 «а», Петрова Руслана – 7 «б», Софронов Вася – 8 «а», Васильев Вадим – 8 «а», Софронов Вася 8 «а», Семенова Сусанна – 8 «б», Колтовской Максимилиан – 10 –с, Николаева Ньургуяна – 11-с –кылаас үөрэнээччилэрэ оскуола чулуу спортсменнарын үрдүк аатын сүкпүттэрин туоһулуур анал мэтээллэри, Добун суруктары уонна төрөппүттэригэр махтал суруктары оскуола администрациятын аатыттан үөрүүлээх быһыыга – майгыга туттулар.
Салгыы Эһээ Дьыл бэлэхтэрин туттарыы, улахан кылаас оҕолор интэриэстэрин тардар көхтөөх үҥкүү – битии кэннэ «Король и Королева Бала” таллылар.
Театральнай ис хоһоонноох мустубут оҕолорго дуоһуйууну аҕалар бырааһынньыгы чахчы театрга сыһыаннаах, талааннаах киһи тэрийэр. Махтал буоллун, салайааччы – режиссер, сценарист Сардаана Романовнаҕа уонна кинини кытары биир санаанан сылайары билбэккэ тэҥҥэ үлэлэспит коллегаларыгар Сардаана Станиславовнаҕа, Туйаара Леонидовнаҕа, Вилена Александровнаҕа, Эһээ Дьыл оруобун толорбут Мыкыты Игорьга, Хаарчаана — Елизавета Григорьевна!
Кэлэр Саҥа дьыл бука барыгытыгар үгүс элбэх ситиһиилэри, үрдүккэ дабайыылары аҕаллын, үөрүүгүтүн үксэттин!
Наталья Иванова, улуустааҕы үөрэх салалтатын исписэлииһэ
