От ыйын 5 күнүгэр «Триумф» спорт уораҕайыгар 45 — 60 кг үөһээ ыйааһыннаах уолаттарга хапсаҕай көрүҥэ буолан ааста. Тыҥааһыннаах киирсиилэр кэннилэриттэн саха уолаттара иккилии боруонса, үрүҥ көмүс, кыһыл көмүс мэтээллэри ылары ситистилэр. Үөһээ Бүлүү Оҥхойуттан төрүттээх Сандал Алексеев 50 кг ыйааһыҥҥа Азия оҕолорун кыһыл көмүс призера буолары ситистэ!
«Кыайыыбын тириэньэрбэр Платон Егорович Саввиновка, ийэбэр, чугас дьоммор аныыбын», — диэтэ Сандал кыайыытын кэнниттэн.
Сандал Оҥхой орто оскуолатын IX кылааһын үөрэнээччитэ, хапсаҕайынан умсугуйан туран дьарыктанар (тириэньэр П.Е.Саввинов).
Бэлиэтээн эттэххэ, Үөһээ Бүлүүттэн кыттыбыт оҕолорбут уопсайа 4 мэтээллээхтэр: мас тардыһыыктар Саша Захаров, Харысхан Габышев, хапсаҕайдьыт Сандал Алексеев — кыһыл көмүс, Саян Саввинов үрүҥ көмүс мэтээллээхтэр. Оҕолор бары Оҕо спортивнай оскуолатыгар дьарыктаналлар.
Мария Васильева,
«Үөһээ Бүлүү» хаһыат
Хаартыскалар: Азия оҕолорун оонньууларын дирекцията